ტურისტული სეზონის დადგომამდე არსებული უარყოფითი მოლოდინებიდან გამომდინარე, არ არის დაბალი ალბათობა იმისა, რომ ლარი კიდევ უფრო გაუფასურდეს, - ამის შესახებ "ინტერპრესნიუსს" ეკონომისტმა აკაკი ცომაიამ განუცხადა.

ლარის კურსის ბოლოდროინდელი რყევები, ცომაიას აზრით, მოკლევადიან ეკონომიკურ რყევებს და უარყოფით მოლოდინებს უკავშირდება.

"არჩევნები ახდენს მოკლევადიან ეკონომიკურ რყევებს, ანუ რეალურად ეკონომიკა წონასწორობის მდგომარეობიდან გამოდის და ახალი წინასწორობა დგინდება, მათ შორის ლარის კურსზეც. ამას ემატება კიდევ ის, რომ თითოეულ ჩვენგანს გვაქვს მოლოდინი, რომ ლარი კიდევ უფრო გაუფასურდება, ამიტომ უფრო მეტი ადამიანი შემოსავლის დიდი ნაწილის უცხოურ ვალუტაში კონვერტაციას ახდენს", - განაცხადა ცომაიამ.

მისი თქმით, ამ ვითარებაში მთავრობა უნდა ცდილობდეს, რომ შემოსავლებისა და ხარჯების წონასწორობა საანგარიშო პერიოდში იყოს მუდმივად დაცული იმისათვის, რომ ეკონომიკა არ გამოვიდეს წონასწორობის მდგომარეობიდან.

რაც შეეხება ეროვნულ ბანკს, აკაკი ცომაიას თქმით, მას სწორება აქვს ინფლაციურ სამიზნე ნიშნულზე და სავალუტო კურსის რყევას ყურადღებას არ აქცევს.

რა არის ლარის გაუფასურების მიზეზი? არის თუ არა ეს ჩატარებული არჩევნები? როგორც ექსპერტმა ვაჟა კაპანაძემ რადიო "პალიტრის" გადაცემა "საქმეში" განაცხადა, ეროვნული ვალუტის გაუფასურება არ გამოუწვევია არჩევნებს.

"რა დიდი ფული უნდა დაიხარჯოს არჩევნებზე, რომ მეორე დღეს ეს ფული დაგროვდეს. რამდენიმე ათეული მილიონი არაფერი არ არის იმასთან შედარებით, როდესაც ეროვნული ბანკი 40 მილიონს ყიდის ხოლმე აუქციონზე და ვერ ახდენს პროცესებზე გავლენას. ჩემი აზრით, "ბლუმბერგის" სავაჭრო სისტემაში, სადაც კომერციული ბანკები ერთმანეთში ვაჭრობენ, ხდება სპეკულაციები, რაც შეიძლება ლარის გაუფასურების ერთ-ერთ მიზეზად მივიჩნიოთ. არ ვიცი, ეროვნული ბანკი თავისი არაკომპეტენტურობის გამო თუ შეგნებული არჩარევის შედეგად აძლევს მათ იმის საშუალებას, რომ ისეთი კურსები დასვან, რაც მათ აწყობთ", - მიიჩნევს ვაჟა კაპანაძე.

უნდა ჩაერიოს თუ არა ამ ვითარებაში ეროვნული ბანკი? ამ კითხვაზე ექსპერტმა ეკონომიკის საკითხებში გიორგი პაპავამ უპასუხა:

"ჩემი აზრით არ უნდა ჩაერიოს. ზოგადად მიღებულია რომ ეროვნული ბანკი ვერ და არ უნდა აკეთებდეს რამდენიმედღიან გაუფასურებებზე მკაცრ განმარტებებს. იმიტომ რომ იგი ვერ იტყვის რომ ეროვნული ვალუტა აღარ გაუფასურდება და ასე შემდეგ, და თუ მისი ვარაუდი არ გამართლდა, იგი კარგავს სანდოობას. რაც შეეხება ინტერვენციებს, ამ შემთხვევაში ჩემი აზრით საჭირო არ იყო. თუ ეროვნული ბანკი ფიქრობს, რომ რამდნდიმედღიანი გაუფასურება არ გადაიზრდება გრძელვადიან გაუფასურებაში, მაშინ მან არ უნდა მოახდინოს ინტერვენცია", - განაცხადა გიორგი პაპავამ.

ეროვნული ბანკის ოფიციალური მონაცემებით, ზაფხულის განმავლობაში 1 დოლარის ღირებულება სტაბილურად დაახლოებით, 2 ლარი და 38-41 თეთრის ფარგლებში იყო. აგვისტოს ბოლოდან ეროვნული ვალუტა ნელ-ნელა რამდენიმე პუნქტით, ბოლო სამ დღეში კი 6 თეთრით გაუფასურდა. ოფიციალური მონაცემებით, დღეს 1 დოლარი 2 ლარი და 54 თეთრი ღირს, თუმცა სავალუტო ჯიხურებსა და ბანკებში კურსი რამდენიმე პუნქტით მაღალია.