რა გზის გავლა სჭირდება ქართველ მეწარმეს ჩინეთის ბაზარზე მოსახვედრად | Allnews.Ge

ოთხი თვეა საქართველოსა და ჩინეთთან თავისუფალი ვაჭრობის ხელშეკრულება ამოქმედდა, შესაბამისად, ქართულ კომპანიებს, რომლებიც პროდუქციის ჩინეთში ექსპორტით არიან დაინტერესებულები, შესაძლებლობა მიეცათ საიმპორტო ტარიფის გადახდის გარეშე მსოფლიოს ერთ-ერთ ყველაზე დიდ ბაზარზე მოხვდნენ.

ამ შესაძლებლობას კარგად იყენებს "კახური ტრადიციული მეღვინეობის" დამფუძნებელი ზურაბ ჩხაიძე. რა გზის გავლა სჭირდება ქართველ მეწარმეს ჩინეთის ბაზარზე მოსახვედრად და რამდენად წარმატებულია ჩინეთში ექსპორტი, ამის შესახებ Allnews.ge-ს თავად ზურაბ ჩხაიძე ესაუბრა.

"ამ 4 თვის მანძილზე საკმაოდ კარგი მატება გვაქვს. შარშანდელ კალენდარულ პერიოდთან შედარებით დაახლოებით 30%-იანი მატება გვაქვს. საშუალოდ 200 000 ერთეული ღვინო და ბრენდი გვაქვს გადატვირთული ჩინეთში. რაც იმის მაჩვენებელია, რომ ინტერესი მაღალია. ჩინეთის ბაზარზე 6 კონტრაქტორი გვყავს და ინტერესი მუდამ იზრდება. ჩინეთთან თავისუფალი ვაჭრობა უფრო მეტ საშუალებას იძლევა, რომ დახლზე ჩვენი პროდუქცია აქამდე არსებულზე შედარებით დაბალ ფასად ხვდება. შესაბამისად, საქართველოდან ექსპორტზე გატანილი ჩვენი პროდუქცია, ეს არის ღვინო, ბრენდი და ხილის სხვადასხვა პროდუქტი, გადასახადით არ იბეგრება.

არის კიდევ კიდევ სხვა ფაქტორი, გამოფენები, რომელშიც ჩვენ აქტიურად ვმონაწილებთ და წელსაც ჩინეთის მიმართულებით დაახლოებით 6-7 გამოფენა იგეგმება, ერთ-ერთი არის ნოემბერში, რომელიც საქართველოს ეკონომიკის სამინისტროსა და ჩინეთის მთავრობის ხელშეწყობით კეთდება. როდესაც ჩინეთის მთავრობა დაინტერესებულია, ცხადია უფრო მაღალი აქტივობაა.

დღეს ბიზნესის სწავლის საშუალება გვაქვს და შეგვიძლია, ნებისმიერი პროდუქცია აქ ვაწარმოოთ და გავყიდოთ ჩინეთში ან გნებავთ ჩინეთიდან შემოვიტანოთ და აქ გავყიდოთ. ჩემი სურვილია ქართული პროდუქციის არეალი გაიზარდოს. მახსოვს 5-6-7 წლის წინ ჩინეთში პროდუქციას სულ რამდენიმე კომპანია ვყიდდით და ძალიან კარგია, რომ ამ მიმართულებით ინტერესი გაიზარდა".

ჩინური ბაზრის მოთხოვნის გათვალისწინებით, საექსპორტოდ ახალი ტიპის პროდუქცის წარმოებას ხომ არ გეგმავთ?

ვფიქრობ, უფრო მეტის საშუალება მოგვეცა და ეს იმას ნიშნავს, რომ ჩვენ შეგვიძლია, სხვა ქვეყნებსაც გავუსწაროთ, რომელთაც აქამდე კონკურენციას ვერ ვუწევდით. ჩინურ ბაზარზე წითელ ღვინოზე უფრო მეტი მოთხოვნაა, ვიდრე თეთრზე. რაც შეეხება ახალ პროდუქციას, ცხადია, მწარმოებლები ვართ და სიახლის განხორციელება ყოველთვის დაფიქრებულად უნდა მოხდეს.

ჯერ უნდა მოხდეს ბაზრის შესწავლა, რის შემდეგაც შეიძლება ამაზე საუბარი. ახლა კი შემიძლია პირველად გავაჟღერო, რომ ჩინეთის წარმოება შეიძლება აქ გაკეთდეს და ამასაც დაკვირვების რეჟიმში ვუყურებთ. აქ ღვინის წარმოებაზე არ არის საუბარი. ჩინეთი ტექნოლოგიურად საკმაოდ მაღალ დონეზეა და არ გამოვრიცხავ, რომ ჩვენ იქიდან რაღაც შემოვიტანოთ, თუმცა ეს შორეული პერსპექტივაა, მაგრამ კარგია, რომ ამაზე დიალოგი მიმდინარეობს.

ქართული ბიზნესი ჩინელ პარტნიორებთან ერთად, 2-3-4 წელიწადში უფრო კარგ ეფექტს მოახდენს. რა თქმა უნდა, ეკონომიკური სიძლიერე სწორედ ეს არის, ვინაიდან თვითონ ჩინეთი ისწრაფვის, რომ წარმოების ზონა გააფართოვოს და ევროპის ქვეყნებს აქედან დაუკავშირდეს. ეს ძალიან ხელსაყრელია, იმიტომ რომ ქართულ პროდუქციას ევროპასთან აქვს თავისუფალი ვაჭრობა. ოღონდ ეს არც ერთ დღეში კეთდება და არც ერთ თვეში, ამას წინ უძღვის გარკვეული მოლაპარაკება და შემდეგ უკვე ლოგიკური დასაწყისის დასარული.

როგორ სტანდარტებს უწესებს ჩინური ბაზარი პროდუქციას, არის გარკვეული შეზღუდვები ამ მიმართულებით?

მე ჩვენს ჯგუფზე მოგახსენებთ, ევროსტანდარტებს შეესაბამება ჩვენი აბსოლუტურად ყველა პროდუქცია. ჩვენ ეს სტანდარტი დამკვიდრებული გვაქვს როგორც ღვინის, ასევე ხილის წარმოებაში და ჩინეთის ბაზარს აბსოლუტურად აკმაყოფილებს. ჩინეთის ბაზარს ცალკე სტანდარტები და შეზღუდვა არ აქვს, ვინაიდან ჩვენი პროდუქცია განბაჟებისას უამრავ შემოწმებას გადის. ჩვენ მსოფლიო სტანდარტებით დაცულ პროდუქციას ვაწარმოებთ, რომელიც საკმაოდ მისაღებია ჩინეთისთვის.

რამდენიმე რჩევა მოგვეცით, რა უნდა გაითვალისწინოს კომპანიამ, რომელსაც სურს, რომ პროდუქცია ექსპორტზე ჩინეთში გაიტანოს?

ძალიან რთულია ამის ცალსახად თქმა, ცხადია, ყველაფერი უნდა გაითვალისწინოს. ბიზნეს საქმიანობა და ზოგადად, მეღვინეობა შემიძლია ინტელექტუალურ სამუშაოს შევადარო. ვინაიდან მისი წარმოებიდან დაწყებული, როდესაც პროდუქცია ჩინეთში იმპორტირებული იქნება, იგი უნდა გაიხსნას და როდესაც მისი მოხმარება ხდება, იქ უკვე სხვადასხვა აზრი ყალიბდება და ყველა აზრი უნდა გაითვალისწინო, რაც საკმაოდ საკმაოდ რთულია, ამიტომ რა თქმა უნდა, ყველა დეტალი უნდა გაითვალისწინონ.

ჩინელი პარტნიორების მოძიებაში ეკონომიკის სამინისტროც ჩართულია თუ თქვენი კომპანია თვითონ ამყარებს მათთან კონტაქტებს?

სახელმწიფოს ჩართულობა მნიშვნელოვანია საკანონმდებლო დონეზე, გადასახადების კუთხით, რასაც ვფიქრობ, რომ საკმაოდ კარგად ართმევს თავს. გარდა ამისა, იგეგმება ორმხრივი ღონისძიებები, რაშიც, რა თქმა უნდა, ეკონომიკის სამინისტრო ჩართულია, თუმცა, რასაც პარტნიორის მოძიება ჰქვია, უფრო პირადული და ინდივიდუალურია. პირდაპირ გეტყვით, რომ ჩინური კომპანიების მხრიდან კონკრეტულად ჩვენს კომპანიას რამდენიმე სერიოზული შემოთავაზება ჰქონდა. იყო ახალი ქარხნის შეძენისა და ჩვენი თანაინვესტირების შემოთავაზება. ჩვენი ჩინელი პარტნიორების საქართველოში ინვესტირება საკმაოდ დიდ ინტერესს იწვევს და ჯერჯერობით ჩვენ სტრატეგიული გადაწყვეტილება ამის შესახებ არ მიგვიღია, თუმცა გვახარებს და ნამდვილად საამაყოა, როდესაც შენს ქვეყანაში შემოდიან და კონკრეტულად ამა თუ იმ სფეროთი არიან დაინტერესებულები.

შეგახსენებთ, ჩინეთთან თავისუფალი ვაჭრობის ხელშეკრულება 2018 წლის 1-ელი იანვრიდან ამოქმედდა. ხელშეკრულების თანახმად, ჩინეთში ქართული პროდუქციის 94%-ზე მეტის გატანა ნულოვანი საიმპორტო ტარიფითაა შესაძლებელი. ამ პროდუქციის ჩამონათვალში კი ღვინო, ბრენდი, მინერალური წყალი, უალკოჰოლო სასმელები, ღორისა და ფრინველის ხორცი, ხილი და ბოსტნეული, თაფლი, თაფლი, თხილი, შოკოლადის ნაწარმი, ჩაი, ხილ-ბოსტნეულის კონსერვები და წვენები, კოსმეტიკური ნაწარმი და სამკურნალო საშუალებები, ხე-ტყე, ტექსტილი, კაბელები, შავი ლითონი და მეტალო კონსტრუქციები, პლასტმასის ნაწარმი, სარეცხის მანქანები, წყლის გამაცხელებელი და სხვა ელექტროსაქონელია.