"საქართველოს ბანკმა" კლიენტებს 2018 წლის ივნისიდან ამოქმედებული ცვლილებების შესახებ აცნობა. ბანკის ინფორმაციით, ცვლილებები შედის ფიზიკური პირების საბანკო მომსახურების ხელშეკრულებაში. გთავაზობთ, "საქართველოს ბანკის" ვებგვერდზე  გამოქვეყნებულ ინფორმაციას:

"ფიზიკური პირების საბანკო მომსახურების საერთო პირობებში შევიდეს შემდეგი სახის ცვლილება/დამატება:

1. საერთო პირობების 13.1. პუნქტი შეიცვალოს და ჩამოყალიბდეს შემდეგი რედაქციით:

"13.1. ბანკი უფლებამოსილია, ნებისმიერ დროს, ვებ-გვერდზე შესაბამისი ინფორმაციის განთავსების გზით ან/და ბანკისათვის მისაღები სხვა ფორმით, თუ კანონმდებლობით სხვა რამ არ არის განსაზღვრული, კლიენტის დამატებითი თანხმობისა და აქცეპტის გარეშე, შეცვალოს ხელშეკრულების ან/და ნებისმიერი საბანკო პროდუქტის ნებისმიერი პირობა (მათ შორის და არა მხოლოდ ნებისმიერი საბანკო პროდუქტის მოცულობა, მოქმედების ვადა ან/და საპროცენტო განაკვეთის, საპროცენტო სარგებლის, საკომისიოს, პირგასამტეხლოს ან/და სხვა გადასახდელის მოცულობა/ოდენობა ან/და მათი დარიცხვის წესი ან/და გადახდის ვადა). ამგვარი ცვლილება სავალდებულოა კლიენტისთვის მისი გამოქვეყნების დღის მომდევნო საბანკო დღიდან, თუ ბანკის მიერ ან/და კანონმდებლობით სხვა რამ არ არის განსაზღვრული. ამასთან, აღნიშნული ცვლილებები შესაძლებელია შეეხოს, როგორც პირთა გარკვეულ ჯგუფს, ისე კონკრეტულ პირს."

2. საერთო პირობებს დაემატოს ტერმინი კრედიტუნარიანობა და ჩამოყალიბდეს შემდეგი რედაქციით:

"კრედიტუნარიანობა - ბანკში დადგენილი წესებისა და პროცედურების შესაბამისად, ბანკის მიერ კლიენტის შეფასება, კლიენტის მიერ კრედიტის შესაბამისი პირობებით მიღების შესაძლებლობასთან დაკავშირებით."

3. საერთო პირობებს დაემატოს 3.56. პუნქტი და ჩამოყალიბდეს შემდეგი რედაქციით:

"3.56. კლიენტისათვის ბანკის მიერ ან/და ბანკის სხვა კლიენტის მიერ მომსახურების გაწევის მიზნით, ბანკი უფლებამოსილია, მის მიერ განსაზღვრული ფორმითა და შინაარსით, კლიენტის კრედიტუნარიანობის შესახებ ინფორმაცია მიაწოდოს თავად კლიენტს ან/და მესამე პირს."