ბათუმის საქალაქო სასამართლომ გუშინ მიიღო გადაწყვეტილება და ბათუმში სასტუმრო "ველმონდს", ყოფილ "ლეო გრანდს" საქმიანობის უფლება შეუჩერა, - ამის შესახებ სასტუმროს იურისტმა კახაბერ წერეთელმა ჟურნალისტებს განუცხადა.

ადვოკატის თქმით, ისინი სასამართლო პროცესს არ ესწრებოდნენ და ბათუმის საქალაქო სასამართლოს გადაწყვეტილებას გაასაჩივრებენ.

ადვოკატი მიიჩნევს, რომ სასამართლომ უსაფუძვლო გადაწყვეტილება მიიღო, ვინაიდან სასამართლოს სასტუმროს არგუმენტები არ მოუსმენია.

როგორც კახაბერ წერეთელი ამბობს, სასტუმროსთან ერთად ფუნქციონირების უფლება სამორინესაც შეუჩერდა.

"კვირას საღამოს გვაცნობეს, რომ პროცესი უნდა გამართულიყო ორშაბათს. სასამართლომ არ ჩათვალა საჭიროდ, რომ ჩვენ პროცესს დავსწრებოდით და ვერ წარვადგინეთ ჩვენი პოზიცია. გადაწყვეტილებას აუცილებლად გავასაჩივრებთ",- განაცხადა კახაბერ წერეთელმა.

როგორც ყოფილი "ლეო გრანდის" მენეჯერმა, ალპერ პინარმა ჟურნალისტებს განუცხადა, სახანძრო უსაფრთხოების დაცვასთან დაკავშირებით სამუშაოების დიდი ნაწილი შესრულებულია.

სასტუმროს მენეჯერის ინფორმაციით, საგანგებო სიტუაციების მართვის სამსახურთან ჰქონდათ შეთანხმება, რომ წლის ბოლომდე ყველა შენიშვნა აღმოიფხვრებოდა.

აღსანიშნავია, რომ სასტუმროს წარმომადგენლებმა დღეს ჟურნალისტებს შენობის ის ნაწილი დაათვალიერებინეს, სადაც ხანძარი გაჩნდა.

"სახანძრო სამსახური ყოველთვის მოდის და ამოწმებს სასტუმროში სახანძრო უსაფრთხოებას. საგანგებო სიტუაციების მართვის სამსახურიდან ჩვენ გვქონდა 44 პუნქტი გაწერილი, რომლის დიდი ნაწილი შესრულებულია. ჩვენ გვაქვს გარკვეული დრო და ვასრულებთ ამ პრობლემას", - განაცხადა ალპერ პინარმა.

ბათუმში, ყოფილი "ლეო გრანდის" სასტუმროს შენობის ექსპლუატაციის შეჩერების მოთხოვნით სასამართლოს საგანგებო სიტუაციების მართვის სამსახურმა მიმართა.

შეგახსენებთ, რომ აღნიშნულ სასტუმროში, გასული წლის 24 ნოემბერს ხანძარი გაჩნდა, რის შედეგადაც 11 ადამიანი დაიღუპა.