დღეს ვხვდები ფსიქოლოგებსა და ბავშვთა უფლებებზე მომუშავე ორგანიზაციების წარმომადგენლებს - სწორედ ერთობლივი ძალისხმევით აუცილებლად მივაღწევთ იმას, რომ უკლებლივ ყველა სკოლა მაქსიმალურად უსაფრთხო გახდეს და მსგავსი ტრაგედია აღარასდროს განმეორდეს, - ამის შესახებ განათლებისა და მეცნიერების მინისტრმა მიხელ ჩხენკელმა პრესკონფერენციაზე განაცხადა.

როგორც მინისტრმა განაცხადა, სისტემაში დაინერგება კონფლიქტების მართვის, პრევენცია-მედიაციის პროგრამები, რისთვისაც პროფესიონალებთან ერთად იმუშავებენ ფსიქოლოგიის სპეციალობის მაგისტრანტები და დოქტორანტები. მიხეილ ჩხენკელის განცხადებით, პროცესში ჩართულები იქნებიან ასევე მშობლებიც.

რა უფლება-მოვალეობა აქვს მანდატურს სკოლაში

"განათლებისა და შინაგან საქმეთა სამინისტროების ერთობლივი ჯგუფი ასევე იმუშავებს არასრულწლოვნებისთვის ფსიქოლოგიური და საკონსულტაციო სერვისების უზრუნველყოფაზე, დაინერგება კონფლიქტების მართვის, პრევენცია-მედიაციის პროგრამები. 24-საათიან რეჟიმში იმუშავებს ფსიქოლოგიური სამსახურის ცხელი ხაზი. ქვეყნის უკლებლივ ყველა სკოლა რომ მოვიცვათ, პროცესში, პროფესიონალებთან ერთად, ჩართულები იქნებიან უმაღლესი სასწავლებლების ფსიქოლოგიის სპეციალობის მაგისტრანტები და დოქტორანტები. განსაკუთრებულ მნიშვნელობას ვანიჭებთ ამ პროცესში მშობლების აქტიურ მონაწილეობას. ეს გულისხმობს, როგორც ერთი მხრივ, მშობლების ინტენსიურ ჩართულობას სკოლის ცხოვრებაში, ასევე, მათთვის საჭირო საინფორმაციო-საკონსულტაციო მომსახურების შეთავაზებას. ჩვენ არა მხოლოდ დანაშაულის პრევენციაზე უნდა ვიზრუნოთ, არამედ, უპირველეს ყოვლისა ისეთი ვითარების ფორმირებაზე, სადაც ძალადობა და აგრესია დაუშვებელია.

მჯერა, რომ რაც არ უნდა რთულად გვეჩვენებოდეს ეს, ჩვენ სწორედ ამ მიზნისკენ უნდა ვიმოძრაოთ. ეს კი მხოლოდ ცოდნისა და განათლების გავრცელების, ღირებულებათა სწორი სისტემის, ჯანსაღი ცხოვრების წესის დამკვიდრებით მიიღწევა. სამინისტრო გახსნილია საზოგადოებასთან თანამშრომლებისთვის", - განაცხადა მიხეილ ჩხენკელმა.

მისივე  განცხადებით, მანდატურის სამსახურის სრული შესწავლა მოხდება. ჩხენკელის ინფორმაციით, დღეს გაიმართება უეყებათაშორისი სამუშაო ჯგუფის პირველი შეხვედრა, რომელმაც უკვე დასახა პირველადი სტრატეგია რამდენიმე მიმართულებით.

"მანდატურის სამსახურის სრული შესწავლა მოხდება. მათი მუშაობა სხვა უწყებებთან, პატრულთან გაღრმავდება. საწყის ეტაპზე პატრული იქნება ჩართული ამ პროცესებში. მაგალითად, სკოლის მიმდებარე ტერიტორიის მონიტორინგი იქნება ერთ-ერთი მიმართულება, სადაც პატრული აქტიურად იქნება ჩართული. როგორ იქნება ეს განხორციელებული, ამას ჩვენ სამუშაო ჯგუფთან ერთად გადავწყვეტთ, მაგრამ კონტროლი სკოლების მიმდებარე ტერიტორიებზე აუცილებლად გაძლიერდება. ეს შეეხება ყველა სკოლას,"- განაცხდა მიხეილ ჩხენკელმა.