სოფელ იორმუღანლოში სკოლიდან გათავისუფლებული მასწავლებელი მოსწავლეების ნაწილს გაკვეთილებს გარეთ უტარებს | Allnews.Ge

საგარეჯოს რაიონ სოფელ იორმუღანლოში ქართული ენისა და ლიტერატურის მასწავლებლის, თეა გურგენიძის სამსახურიდან გათავისუფლებას მოსწავლეებისა და მათი მშობლების ნაწილის პროტესტი მოჰყვა - მეოთხეკლასელთა ნაწილი უკვე რამდენიმე დღეა საგაკვეთილო პროცესს არ ესწრება და თეა გურგენიძის პედაგოგის პოზიციაზე აღდგენას ითხოვს.

როგორც საგარეჯოს საგანმანათლებლო რესურცენტრის უფროსი, მანანა ცუცქირიძე აცხადებს, თეა გურგენიძის სამსახურიდან გათავისუფლება მის მიერ მოსწავლეზე ფიზიკურ ზემოქმედებას მოჰყვა, რასაც შესაბამისი ვიდეომასალაც ადასტურებს, აქედან გამომდინარე მიმდინარე წლის 21 მაისს დირექტორმა გამოსცა ადმინისტრაციული აქტი პედაგოგის სამსახურიდან გათავისუფლების თაობაზე, რის შემდეგაც თეა გურგენიძე დაკავებული პოზიციიდან გაათავისუფლეს.

"განათლებისა და მეცნიერების სამინისტროს შიდა აუდიტის დეპარტამენტმა ამ საქმესთან დაკავშირებით მოკვლევა დაასრულა, რის შედეგადაც დადასტურდა, რომ თეა გურგენიძემ მოსწავლეს ფიზიკური შეურაცხყოფა მიაყენა - სწორედ ეს არის მისი სამსახურიდან გათავისუფლების საფუძველი. ჩვენ შორის არანაირი პირადი კონფლიქტი არც არსებობს და ვერც იარსებებდა, პირიქით, ჩვენ საგანმანათლებლო რესურსცენტრი იმისთვის ვარსებობთ, რომ ყველა პედაგოგს სწავლების პროცესის ხელშეწყობისა და მოსწავლეებზე ორიენტირებული სასწავლო გარემოს შექმნის შესაძლებლობა მიეცეს", - განმარტა მანანა ცუცქირიძემ Allnews.ge-სთან საუბარში.

როგორც რესურსცენტრის უფროსი აღნიშნავს, თეა გურგენიძე მის სამსახურიდან გათავისუფლებას თავდაპირველად მანანა ცუცქირიძესთან პირად უთანხმოებას, შემდეგ კი სკოლის ქართულ სექტორში არსებულ პრობლემებს უკავშირებს, რაც სიმართლეს არ შეესაბამება.

მისი თქმით, ისიც დანაშაულია, რომ მოსწავლეების ნაწილი ამ დრომდე საგანმანათლებლო პროცესში ჩართული არ არის. გარდა ამისა, გუშინ თეა გურგენიძემ მოსწავლეების ნაწილს გაკვეთილი ღია ცის ქვეშ დადგმულ კარავში ჩაუტარა, რასაც თავადაც ადასტურებს.

"ესეც დიდი დანაშაულია, რომ მეოთხეკლასელ მოსწავლეთა ნაწილი საგანმანათლებლო პროცესს ვერ ესწრება, ნაწილი კი პროცესში ჩართულია და ცრუ ინფორმაცია ვრცელდება. სკოლამ უზრუნველყო პირის გამოყოფა, რომელიც ამ ბავშვებს გაკვეთილებს გურგენიძის ნაცვლად ჩაუტარებს. ეს პირადი დამოკიდებულების ბრალია, ზოგი მშობელი თუ ქალბატონ თეას მხარს უჭერს. ისინი მდგომარეობის სირთულეს ვერ აცნობიერებენ, ეს ძალიან საშიშია, რომ მოსწავლეებს არ უშვებენ სკოლაში. თუ ბავშვები კარავში იქნებიან, მათი უსაფრთხოება დაცული არ არის ან რა ცოდნა უნდა მიიღონ, როდესაც თეა გურგენიძის საგაკვეთილო პროცესის გარდა ბავშვებს აქვთ ინგლისურიწ, სპორტის გაკვეთილები", - აღნიშნა მანანა ცუცქირიძემ.

იორმუღანლოს სკოლიდან გათავისუფლებული პედაგოგი, თეა გურგენიძე ბავშვზე ფიზიკური ზეწოლის ფაქტს უარყოფს. როგორც Allnews.ge-სთან საუბარში განმარტავს, აპირებს, საკუთარი პოზიციის დასაცავად სასამართლოს მიმართოს.

"მე არ ვიცი, ვინ არის გადაწყვეტილების მიმღები და შემსრულებელი, ახლა კონკრეტულად ვერ ვიტყვი, მაგრამ ფაქტია, რომ დირექტორმა დაწერა ბრძანება და დირექტორი ვალდებულია, დაიცვას საკუთარი აზრი, უფლებები და თქვას, თუ ვინმემ აიძულა, ხოლო თუ არ აიძულა, მაშინ შესაბამისად მე დირექტორთან მაქვს პრეტენზია. მიზეზად ბავშვის წამების ფაქტს მისახელებენ, მე უარვყოფ. რა აძლევთ ამის თქმის მიზეზს, ამას გამოძიება დაადგენს, რომლის პროცესშიც ყველა ძალიან ბევრ შეკითხვაზე გავცემთ პასუხს. ახლა რომ მოხვიდეთ და ნახოთ, რომელ შენობაშიც ვართ შემოკედლებული, ნახავთ რომ გაკვეთილს ვუტარებ 17 მოსწავლეს. ხოლო ორი თუ სამი მოსწავლე, დირექტორის შვილიშვილი, მისი ბიძაშვილი და სასწავლო ნაწილის ნათესავი საგაკვეთილო პროცესს ესწრებიან სკოლაში. აქ მოსული ბავშვები მიდასტურებენ, რომ მათ ოჯახებში მისულები იყვნენ სასწავლო ნაწილი და რესურსცენტრის დირექტორის მეუღლე, რომლებიც ბავშვებს დაემუქრნენ, რომ თუ გაკვეთილებს არ დაესწრებოდნენ, სკოლიდან გარიცხავდნენ და ვინც დააშინა, იქ უზით. ქალბატონმა მანანამ გააკეთა განცხადება, რომ თურმე მშობლებს იმდენი შეგნება არ ჰქონიათ, რომ ვერ იგებენ საკუთარი შვილებისთვის რა არის კარგი და რა არის ცუდი,“ - განმარტავს თეა გურგენიძე.

სკოლიდან გათავისუფლებული პედაგოგის თქმით, მისი და მოსწავლეების პროტესტი იქამდე გასტანს, სანამ მას სამსახურში არ აღადგენენ.