თბილისში, "გმირთა მოედანზე", საპილოტე პროექტის ფარგლებში, მზის ენერგიაზე მომუშავე ოთხი "ლედ" სანათი დამონტაჟდა. პს "თბილსერვის ჯგუფის" ინფორმაციით, ისინი ამჟამად სატესტო რეჟიმში მუშაობენ. სანათებს ენერგიის შენახვისა და მოხმარების სამდღიანი რესურსი აქვს.

სანათები სპეციალური მზის ელემენტებითაა აღჭურვილი, რომელთა საშუალებითაც, მიღებული მზის ენერგია ელექტროენერგიად გარდაიქმნება და ღამით ავტომატურად ირთვება. "თბილსერვის ჯგუფის" გარე განათების დარგში, დირექტორის მოადგილის, ვეფხია ბაძაღუას თქმით, სანათები აზერბაიჯანულმა კომპანიამ უწყებას უსასყიდლოდ გადასცა.

"ამ ეტაპზე დაკვირვება მიმდინარებს. ჩვენ, ზოგადად, "ლედ სანათებზე გადასვლას ვფიქრობთ და შესაბამის პროექტს ვამზადებთ, თუმცა ჯერ საბოლოო გადაწყვეტილება მიღებული არ არის. მზის სანათებს ელექტროენერგიის ხარჯი საერთოდ არ აქვს, მაგრამ ვაკვირდებით, რას მოგვცემს ექსპლუატაციაში, ბატარეა რამდენად გაძლებს, ამინდის პირობებს როგორ გაუძლებს. თბილისის რელიეფის გათვალისწინებით, ზოგი სანათი ხის ქვეშაა მოქცეული,"-განმარტავს ვეფხია ბაძაღუა.

მისი თქმით, მზის ენერგიაზე მომუშავე "ლედ" სანათების სინათლე, საგნების აღქმას ხელს უკეთ უწყობს, ვიდრე ჩვეულებრივი სანათების მიერ გამომუშავებული სინათლე.