მასაკო ვაკამაია 81 წლისაა და სმარტფონისთვის თავისი პირველი აპლიკაცია გამოუშვა. მისი თქმით, როდესაც სმარტონში აპლიკაციებს წერდა, შეამჩნია, რომ მისი ასაკის ადამიანისთვის გასართობი პროგრამები ცოტა იყო.

"ახალგაზრდებთან თამაშის დროს, ჩვენი ასაკის ადამიანები ადვილად მარცხდებიან, რადგან მათსავით სწრაფები ვეღარ არიან. ამიტომ გადავწყვიტე, შემექმნა აპლიკაცია, რომლის საშუალებითაც მოხუცებს სმარტფონებით დავაინტერესებდი. ამისთვის ნახევარი წელიწადი დამჭირდა"-განაცხადა ვაკამაიამ CNN-თან ინტერვიუში.

მასაკო ვაკამაია მოხუც დედას უვლიდა, მეგობრებისთვის კი დრო აღარ რჩებოდა, ამიტომ 60 წლის ასაკში, კომპიუტერის ათვისება გადაწყვიტა. ვაკამაიას თქმით, კომპიუტერული პროგრამების სასწავლად მას სამი თვე დასჭირდა.

მისი აპლიკაცია, სახელად Hinadan-ი, Apple-ის IOS-ის თამაშია, რომელიც ტრადიციულ იაპონურ ფესტივალ "ჰინამატსურიზეა" (თოჯინების დღე) დაფუძნებული და მარტში აღინიშნება.

"ჰინამატსურის" დროს, ლამაზად ჩაცმულ თოჯინებს იმპერატორს წარუდგენენ, ვაკამაიას მიერ შექმნილ თამაშში კი მომხმარებლებმა თოჯინები ლამაზად უნდა მორთოს, შემდეგ კი ფესტივალზე სწორი პოზიცია მიუჩინოს.

"პროფესიონალიზმი სულ არ გჭირდება, ყველაფერი კრეატიულობაზეა დამოკიდებული,"-აცხადებს ის.

ვაკამაიას თქმით, Hinadan-ი მისი ერთადერთი აპლიკაცია არ იქნება.

"ბევრი იდეა მაქვს და მინდა, რომ ახალი აპლიკაციები შევქმნა, მაგრამ ჩემი პროგრამული უნარები, ჯერჯერობით სუსტია, სწორედ ამიტომ, მათ გაუმჯობესებაზე ვმუშაობ."-აღნიშნავს ის.

მომზადებულია CNN-ის მიხედვით.