Facebook-მა დეზინფორმაციის გაფილტვრა ახლა უკვე ფოტოებსა და ვიდეოებზეც დაიწყო. ამის შესახებ კორპორატიულ ბლოგში კომპანიის პროდუქციის მენეჯერმა, ანტონია ვუდფორდმა განაცხადა. მისივე თქმით, აქამდე მსგავსი პრაქტიკა მხოლოდ ტექსტური პუბლიკაციების მიმართებით მოქმედებდა.

"კომპანია აქტიურად მუშაობს ახალ ტექნოლოგიებზე, რათა დეზინფორმაციის სხვადასხვა ფორმებს ებრძოლოს", - განაცხადა ვუდფორდმა.

პოტენციურად მცდარი კონტენტის აღმოჩენისთვის კომპანიამ თვითგანვითარებადი მოდელი შექმნა. ის რამდენიმე მეთოდს იყენებს, მათ შორის მომხმარებლებთან უკუკავშირს.

მიღებული ფოტო და ვიდეომასალა "ფაქტჩეკინგისთვის" ეგზავნება Facebook-ის დამოუკიდებელ პარტნიორებს, რომელთა უმრავლესობა მსგავსი მასალების ვიზუალური შემოწმების ტექნიკას ფლობს. ვუდფორდის განცხადებით, ფოტოებიდან ტექსტის ამოღებისთვის შემმოწმებლები სიმბოლოების ოპტიკური ამოცნობის მეთოდს იყენებენ.

შეგახსენებთ, რომ აგვისტოში Facebook-იდან და Instagram-იდან "კოორდინირებული არააუთენტური ქცევის" გამო 650-ზე მეტი გვერდი, ჯგუფი და პირადი ანგარიში წაიშალა.