Not Tonight არის თამაში, რომელიც დისტოპიურ პოსტ- ბრექსიტულ მომავალს წარმოადგენს, სადაც ევროპული ფესვების მქონე მოქალაქეები გეტოებში არიან გადაყვანილები. მოთამაშემ უნდა დააგროვოს გარკვეული თანხა, რათა გაერთიანებულ სამეფოში დარჩეს.

მაიკ როუზი, კომპანია No More Robots-ის დირექტორი: "ბინის მესაკუთრეები ამბობენ - "არ შეუშვა დღეს არცერთი მსგავსი ადამიანი ბინაში". და შენ უნდა გადაწყვიტო, შეასრულებ მათ წესებს თუ არა. საბოლოო ჯამში, შენ გიწევს უაზრო რამეების კეთება - მაგალითად, ლონდონის რომელიმე რაიონში მესაზღვრედ მუშაობა. ეს ძალიან სატირულია".

ტიმ კონსტანტი, Not Tonight-ის კრეატიული დირექტორი: "მახსოვს, როგორ ვცდილობდი ისეთ ღამის კლუბებში შესვლას, სადაც ჩემი ასაკის პირებს არ უშვებდნენ. შემდეგ იყო ასეთი თამაში Papers Please. ეს ჩემთვის ინსპირაცია იყო, თანაც ამ დროს "ბრექსიტის" პროცესი დაიწყო. ორი სხვადასხვა რამ - ღამის კლუბში მოხვედრა და ქვეყანაში ვინმეს შეშვება - ერთმანეთს შეერწყა".

მაგრამ, უნდა ეხებოდეს თუ არა თამაშები ისეთ მნიშვნელოვან სფეროებს, როგორიც პოლიტიკაა?

ტიმ კონსტანტი: "რა თქმა უნდა, 100%-ით ვარ ამაში დარწმუნებული. უფრო დიდ თამაშებში მსგავსი მაგალითებიც ყოფილა. როგორც კერძო კომპანიას, ჩვენ შეგვიძლია, რაღაც განსხვავებული შევქმნათ. თამაშებში მეტი პოლიტიკა უნდა იყოს".

მაიკ როუზი: "მართალი გითხრათ, მსურს, რომ ამ თამაშს დიდი ნეგატიური გამოხმაურებაც მოჰყვეს, იმიტომ რომ ორივე მხარის რეაქცია მაინტერესებს. თუ ამ თამაშს მხოლოდ ევროკავშირში დარჩენის მომხრეები ითამაშებენ, მას აზრი დაეკარგება".