ლეგენდარულმა ბრიტანელმა მუსიკოსმა დევიდ ბოუიმ იცოდა რა საკუთარი სიკვდილის შესახებ, რამდენიმე კომპოზიცია შექმნა, რომლებიც საზოგადოებისთვის ხელმისაწვდომი მისი სიკვილის შემდეგ უნდა გამხდარიყო. დასავლური მედიის მტკიცებით, არსებობს ვრცელი სია სიმღერებისა, რომელიც მომღერალმა სიკვდილამდე ჩაწერა. როგორც ცნობილია, რამდენიმე მათგანი 2017 წელს გამოვა.

დევიდ ბოუი 69 წლის ასაკში, სიმსივნესთან 18 თვიანი ბრძოლის შემდეგ, 11 იანვარს გარდაიცვალა.

მომღერალი, პროდუსერი და გლემ როკის ერთ-ერთი მთავარი წარმომადგენელი, კარიერის 40 წლის მანძილზე მრავალ ჟანრში ქმნიდა მუსიკას. მან პოპულარობა და აღიარება 1972 წელს მოიპოვა, როდესაც ალბომი The Rise and Fall of Ziggy Stardust and the Spiders from Mars გამოვიდა, რომელშიც ბოუი საკუთარ თავს, როგორც უცხო პლანეტიდან მოსულ განმანათლებელს, აცნობდა მსოფლიოს.

დევიდ ბოუი ერთ-ერთი ყველაზე გავლენიანი არტისტი იყო მუსიკალურ სამყაროში. 70-იან წლებში მან კინოშიც გადაინაცვლა და რამდენიმე საკულტო ფილმში მიიღო მონაწილება, მათ შორის The Man Who Fell to Earth და Merry Christmas Mr. Lawrence. გარდა ამისა, ბოუიმ პონტიუს პილატეს როლი ითამაშა მარტინ სკორსეზეს სკანდალურ ფილმში "ქრისტეს უკანასკნელი ცდუნება".

აღსანიშნავია, რომ ბელგიელმა ასტრონომებმა დევიდ ბოუის პატივსაცემად ერთ-ერთ თანავარსკვლავედს მისი სახელი უწოდეს.