როგორც დაგპირდით, გია ცერცვაძე თავისუფალია, უკრაინა თავისიანებს არ ღალატობს, მათ შორის - თუკი ისინი თავისი ქართველები არიან, - ამის შესახებ გუშინ, გვიან საღამოს, უკრაინის გენერალურმა პროკურორმა იური ლუცენკომ "ფეისბუქის" პირად გვერდზე დაწერა და გია ცერცვაძის გათავისუფლების ამსახველი ფოტო გამოაქვეყნა.

პატიმრობიდან გათავისუფლებულ გია ცერცვაძეს ლუკიანოვსკის წინასწარი დაკავების იზოლატორთან შეკრებილი თანამებრძოლები ოვაციით შეხვდნენ. ცერცვაძემ მოკლე კომენტარი გააკეთა, მადლობა გადაუხადა გულშემატკივრებს და განაცხადა, რომ "არ იცის რაზე ედავება რუსული მხარე".

ადვოკატი ქსენია პროკონოვა აცხადებს, რომ გია ცერცვაძის გათავისუფლების პარალელურად, მეორე ეტაპია გასავლელი, რომ ის რუსეთს არ გადასცენ. "ეს არის დროებითი პატიმრობის მოხსნა, რუსეთისთვის გადაცემის აკრძალვაზე კი საუბარი იქნება საექსტრადიციო შემოწმების დასრულების შემდეგ", - განაცხადა მარია პროკონოვამ.

საკითხთან დაკავშირებით საქართველოს მთავარმა პროკურატურამ, გვიან ღამით განცხადება გაავრცელა და განმარტა, რომ უკრაინელი კოლეგების მიერ მოწოდებული ინფორმაციის თანახმად, უახლოეს პერიოდში დასრულდება საექსტრადაციო წარმოება.

"გია ცერცვაძის მიმართ უახლოეს პერიოდში დასრულდება საექსტრადიციო წარმოებაც, რომელიც ფორმალური გარემოებების გათვალისწინებით გარკვეული პროცედურების განხორციელებას გულისხმობს. როგორც წინა დღეებში, საქართველოს მთავარი პროკურატურა კვლავაც გააგრძელებს უკრაინელ კოლეგებთან თანამშრომლობას მანამ, სანამ საბოლოოდ, გია ცერცვაძის სასარგებლოდ არ დასრულდება მის მიმართ მიმდინარე საექსტრადიციო პროცედურები", - აღნიშნულია პროკურატურის განცახდებაში.

პატიმრობიდან გათავისუფლებულმა გია ცერცვაძემ პირველი შეხვედრა უკრაინაში საქართველოს ელჩთან, მიხეილ უკლებასთან გამართა.

ვიცე-პოლკოვნიკი გია ცერცვაძე, რომელიც აფხაზეთისა და 2008 წლის ომებში რუსეთის წინააღმდეგ იბრძოდა, 15 იანვარს უკრაინაში დააკავეს. მას რუსეთი 2003 წელს დანაშაულის ჩადენაში ედავება, თუმცა ცერცვაძეზე საერთაშორისო ძებნა მხოლოდ 13 წლის შემდეგ, 2016 წლის 23 დეკემბერს გამოცხადდა.