ნებისმიერ მეგაპოლისში ცხოვრებას ბევრი უსიამოვნო თავისებურება აქვს, თუმცა იმ 5 ქალაქში, რომლსაც Allnews.ge BBC-ზე დაყრდნობით წარმოგიდგენთ, წლიდან წლამდე ცხოვრება სულ უფრო უკეთესი და კომფორტული ხდება. Economist Intelligence Unit-ის რეიტინგში მსოფლიოს 140 უმსხვილესი ქალაქი განიხილება. ჩამონათვალი ყოველწლიურად 30 უმნიშვნელოვანესი ფაქტის შედეგს ემყარება, რომლებიც ცხოვრების კომფორტულობაზე ახდენს გავლენას.

მსგავს ფაქტორებს შორისაა უსაფრთხოება, სამედიცინო მომსახურების ხელმისაწვდომობა, განათლება, საკვების, გზებისა და საზოგადოებრივი ტრანსპორტის ხარისხი და რა თქმა უნდა შესაძლებლობა, რომ კარგი დრო გაატარო კაფე-ბარებში. 2018 წელს ვენამ სიის სათავიდან მელბურნი ჩამოაჩოჩა. ყოველწლიურმა კვლევამ აჩვენა, რომ პირველ ათეულში შესული 6 ქალაქი კანადასა და ავსტრალიაში მდებარეობს.

თუმცა, ჩვენ ახლა ყურადღებას არა გამარჯვებულ ქალაქებზე, არამედ იმ ადგილებზე გავამახვილებთ, რომლებიც უკანასკნელი ათწლეულის განმავლობაში ბევრს შრომობდნენ, რათა სიის სათავისკენ წაწეულიყვნენ. ვერც ერთი მათგანი ჯერჯერობით ათეულში ვერ შევიდა, თუმცა მნიშვნელოვან წარმატებას მიაღწია.

ჰონოლულუ, აშშ

ჰავაის შტატის დედაქალაქმა უკანასკნელი 10 წლის განმავლობაში მნიშვნელოვანი წინსვლა განიცადა და ახლა იშშ-ის მასშტაბით საცხოვრებლად ერთ-ერთი ყველაზე კომფორტული ქალაქი გახდა, ამას კი სავარაუდოდ განათლების სფეროში მაღალი მაჩვენებლითა და კულტურით მიაღწია.

თავად ჰონოლულუს მცხოვრებლები ვითარების გაუმჯობესებას მსოფლიო ეკონომიკის ზრდასა და ჰავაიზე ტიპური საქალაქო ცხოვრების წესის დანერგვას უკავაშირებენ, რაც მათთვის აქამდე დამახასიათებელი არ იყო.

ერთ-ერთი ინიციატივა ჰონოლულუში სათემო დასახლებების შექმნა იყო, სადაც დიდი საფეხმავლო ზონები იქნებოდა სეირნობისთვის, როგორიც მაგალითად, უორდ ვილეჯია, სადაც ერთმანეთთან შერეულია სავაჭრო და საცხოვრებელი ფართები. სერიოზული ინვესტიცია განხორციელდა რკინიგზის სისტემაში, რომელიც პირველი იქნება ჰონოლულუში. მისი გახსნა 2020 წლისთვის იგეგმება. მატარებლები ერთმანეთს ქალაქის ბიზნესცენტრსა და გარეუბნებს დააკავშირებს.

ბუდაპეშტი, უნგრეთი

უნგრეთის დედაქალაქსა და ქვეყნის ყველაზე დიდ ქალაქში ბოლო 10 წლის განმავლობაში ინფრასტრუქტურა მნიშვნელოვნად გაუმჯობესდა და ბევრს მიაღწია რაიონების კეთილმოწყობაში, რისი შეუმჩნევლობაც ადგილობრივი მაცხოვრებლების მხრიდან შეუძლებელი იქნებოდა.

"გაჩნდა ბევრი ველოტრასა, ავტობუსებისა და ტრავმაების ხაზები დაემატა, რომლებიც მგზავრებს 24 საათის განმავლობაში ემსახურება. ქალაქის ბევრი ნაწილი ფაქტობრივად ახლიდან აღმოცენდა - მათ შორის ისეთები, რომლებიც ყოველთვის მიტოვებულად მიიჩნეოდა"- ამბობს ბუდაპეშტის ჟურნალის The Spoiled Queen-ის დამაარსებელი.

მიუხედავად იმისა, რომ უნგრეთი ჯერ კიდევ V საუკუნიდან ითვლება ღვინისა და მეღვინეობის ქვეყნად, ახლა აქ კრაფტის ლუდისა და ქუჩის საკვების პოპულარობის ბუმია, ყველგან შეიძლება ახლადგახსნილი კაფეების დანახვა. ამ სფეროში გამოცოცხლება მას შემდეგ დაიწყო, რაც უნგრეთი ევროკავშირის შემადგენლობაში შევიდა, ქვეყანაში უცხოური კომპანიები შევიდნენ. გაჩნდა ახალი სამუშაო ადგილები, ქვეყანაში ჩავიდა ბევრი უცხოელი.

ელ-ქუვეითი, ქუვითი

ელ-ქუვეითი მსოფლიოს საუკეთესო ქალაქების სიის ფაქტობრივად ცენტრშია, თუმცა ქალაქი ჩამონათვალის საწყისებისკენ განუხრალად მიისწრაფის.

ქუვეითი სპარსეთის ყურეს, საუდის არაბეთსა და ერაყს შორის არის მოქცეული. ელ-ქუვეითი ყოველთვის იყო მნიშვნელოვნი საპორტო ქალაქი საერთაშორისო ვაჭრობისთვის. უკანასკნელი ათწლეულის განმავლობაში გლობალურმა გავლენამ მის ყოველდღიურ ცხოვრებაში შეაღწია.

"მე იქ გავიზარდე და მახსოვს, რომ ადრე გაცილებით მკაცრი წესები მოქმედებდა, მათ შორის, მუსიკასთან, კინოსთან და თეატრთან მიმართებით. ახლა ყველაფერი იცვლება"- ამბობს მულტიმედიური კომპანია Midwest Immersive-ის დამფუძნებელი აკიბ უსმანი, რომელიც ახლა ამერიკაში ცხვორობს.

თავად უსმანი ამ ცვლილებებს გლობალიზაციასა და ინტერნეტ-კულტურის განვითარებას უკავშირებს. მისი თქმით, ინტერნეტმა უცხოური სამზარეულოსადმიც კი გააჩინა დიდი ინტერესი. მიუხედავად იმისა, რომ ქვეყანა საკმაოდ გახსნილი გახდა დასავლური კულტურისთვის ქვეყანაში მიწის მფლობელები მხოლოდ ადგილობრივები არიან. უცხოელებს, რომლებიც ქუვეითში ბიზნესის დაწყებას გეგმავენ ადგილობვრივი პარტნიორი უნდა ჰყავდეთ, რომლის წილი ბიზნესში 51%-ზე ნაკლები არ იქნება.

ოკლენდი, ახალი ზელანდია

"ოკლენდი კულტურულად მდიდარია და ეს მდგომარეობა თანდათან უმჯობესდება"- ამბობს ქალაქის მაცხოვრეველი კრისტოფერ ჰილი, ოჯახური დასვენების სააგენტოს Hands Up Holidays-ის კონსულტანტი. ქალაქი მართლაც განიცდის სრულიად განსხვავებული კულტურების გავლენას - აბორიგენების, აზიური და დასავლური კულტურის. ცოტა ხნის წინ აქ სამხრეთამერიკული კულტურაც გაჩნდა.

ამან ქალაქში რესტორნების ბიზნესის ბუმი გამოიწვია, რომელიც სტუმრებს სხვადასხვა ქვეყნისა და კულტურის სამზარეულოს სთავაზობს. ქალაქში რეგულარულად იმართება კულტურული ფესტივალები, მათ შორის ჩინური ახალი წელი.

ბოლო წლებში ოკლენდში მნიშვნელოვნად გაუმჯობესდა ჯანდაცვისა და განათლების სფეროები. თუმცა კრისტოფერ ჰილის განმარტებით, კერძო სკოლებისა და სამედიცინო დაწესებულებების ხარისხი კვლავ გაცილებით უკეთესია, ვიდრე სახელმწიფოსი. თუმცა, მისი თქმით, უმაღლესი განათლება ნებისმიერ შემთხვევაში მართლაც უმაღლეს დონეზეა.

ის, რისი გაუმჯობესებაც ჯერ კიდევ სასურველია, ძირითადად ქალაქის ინფრასტრუქტურაა - ამბობენ ადგილობრივები. თუმცა, როგორც ჰილი ამბობს, ქალაქი სულ უფრო ეფექტურად უმკლავდება საცობთან და საზოგადოებრივ ტრანსპორტთან დაკავშირებულ პრობლემებს.

ტაიბეი, ტაივანი

ქალაქის ხელისუფლება აქტიურად აგრძელებს ინვესტიციების ჩადებას ინფრასტრუქტურისა და ჯანდაცვის გაუმჯობესებაში. მეტრო აქ ქალაქის თითქმის ყველა კუთხეს აკავშირებს ერთმანეთთან და საერთაშორისო აეროპორტამდეც კი მიდის, საიდანაც გაფრენა მსოფლიოს ფაქტობრივად ყველა ქვეყანაშია შესაძლებელია.

ჯანდაცვისა და განათლების შესახებ ადგილობრივები აღფრთოვანებით საუბრობენ.

"ჯანდაცვის სისტემა გასაოცარია - ამას ვამბობ მე, ადამიანი, რომელიც კანადაში გაიზარდა"- ყვება კორპორატიული უფლებების კონსულტანტი შენონ უოტსონი, რომელიც ტაიბეიში ოტავადან გადავიდა საცხოვრებლად.

ტაიბეიში ბავშვები უყვართ, ამიტომ ახალგაზრდა ოჯახებისთვის ტაიბეი იდეალური ადგილია. "მატარებელში, მაშინაც კი როცა ვაგონი ხალხითაა გადავსებული, ადგილს მაშინვე გითმობენ, როგორც კი ბავშვს ხედავენ"- ამბობს ერთ-ერთი ადგილობრივი, ჯუდი ტსუეი.

მიუხედავად იმისა, რომ ტაიბეში სამუშაოს საშოვნელად ჩინურის გარკვეულ დონეზე ცოდნა მაინც საჭიროა, ადგილობრივები ძალიან მეგობრულები არიან და ცდილობენ უცხოელის დახმარებას იმის მიუხედავად, რომ შესაძლოა თავადაც ცუდად იცოდნენ ინგლისური.