ბრიუსელში დღეს ევროკავშირი-თურქეთის სამიტი იმართება. შეხვედრაზე ლიდერები სამოქმედო გეგმის განხორციელებაზე იმსჯელებენ, რომლის მიხედვითაც ანკარამ ევროპის მიმართულებით მიგრანტების ნაკადის შეჩერება უნდა შეძლოს. ევროკავშირი თურქეთს ამ პრობლემის მოგვარების მიზნით, 3 მილიარდ ევროს ჰპირდება. ამას გარდა, ლიდერებს სურთ დაიხუროს ბალკანეთის გზა არალეგალი მიგრანტებისთვის დაიხუროს.

"მიგრაციის საკითხთან დაკავშირებით წინ რთული მოლაპარაკებები გველის", - ამის შესახებ ევროპული გამოცემების ცნობით, გერმანიის კანცლერმა ანგელა მერკელმა განაცხადა. გავრცელებული ინფორმაციით, მერკელი იმედოვნებს, რომ ევროკავშირი-თურქეთის სამიტი, რომელიც დღეს იმართება წინგადადგმული ნაბიჯი იქნება მიგრაციის კრიზისის მოგვარების კუთხით. მისივე თქმით, სასწრაფოდ აუცილებელია თურქეთთან თანამშრომლობა იმისათვის, რომ თავიდან იქნეს არიდებული "ზომების ცალმხრივად" მიღება.

თავის მხრივ თურქეთის პრემიერ-მინისტრმა, აჰმედ დავუთოღლუმ აღნიშნა, რომ ანკარა მზადაა იმუშაოს ევროკავშირთან ერთად ევროპაში მიგრანტების ნაკადის შემცირების მიზნით. მისივე თქმით, ბრიუსელში დღეს მიმდინარე სამიტის თემა მხოლოდ "არალეგულარული მიგრაციის საკითხი არ იქნება, სამიტზე თურქეთის ევროკავშირში მიღების საკითხსაც განიხილავენ".

საბერძნეთის პრემიერ-მინისტრი, ალექსის ციპრასი კი იმედოვნებს, რომ ევროპა გამოსავალს იპოვის. მისივე თქმით, მას სურს არსებითი შედეგის მიღწევა დღევანდელ შეხვედრაზე იმისათვის, რომ ლტოლვილთა ნაკადის შემცირების გეგმა განხორციელდეს.

აღსანიშნავია, რომ თურქეთი ერთ-ერთ მთავარ სატრანზიტო ქვეყანას წარმოადგენს ევროპისკენ მიმავალი ლტოლვილებისთვის. გასულ წელს ევროკავშირში მილიონზე მეტი არალეგალი მიგრანტი ჩავიდა, მათი უმრავლესობა სწორედ თურქეთიდან, შემდეგ კი საბერძნეთიდან გადავიდა დასავლეთ ევროპაში.