ავიაკატასტროფა დონის როსტოვში - დაღუპულია 62 ადამიანი | Allnews.Ge

დონის როსტოვში ავიაკომპანია Fly Dubai-ის კუთვნილმა ბოინგმა დაშვებისას კატასტროფა განიცადა, რასაც 62 ადამიანი ემსხვერპლა. დაღუპულთაგან 55 მგზავრია, დანარჩენი ეკიპაჟის წევრი იყო, დაღუპულთა შორის 4 ბავშვია. რუსეთის საგანგებო სიტუაციების სამსახურმა დონის როსტოვში ავიაკატასტროფის დროს დაღუპულთა სია უკვე გამოაქვეყნა. დაღუპულები სხვადასხვა ქვეყნის მოქალაქეები არიან. უმეტესობა რუსეთის მოქალაქეა, თუმცა არიან უკრაინის, უზბეკეთისა და ინდოეთის მოქალაქეებიც. 

როგორც "რია ნოვოსტი" ტრანსპორტის სამინისტროზე დაყრდნობით წერს, თვითმფრინავმა კატასტროფა დაჯდომის მეორე მცდელობისას განიცადა. რუსეთის საგამოძიებო კომიტეტის ინფორმაციით, მიწასთან შეხებისას ლაინერი აფეთქდა. რუსული მედიის ინფორმაციით, კატასტროფის მიზეზი შესაძლოა ცუდი ამინდი გახდა. როსტოვის მხარის გუბერნატორის, ვასილი გოლუბევის განცხადებით, უამინდობის გარდა ამ ეტაპზე, თვითმფრინავის ჩამოვარდნის სხვა ვერსია არ განიხილება. გამოძიება უკვე დაწყებულია.

თვითმფრინავმა კატასტროფა მოსკოვის დროით 03:40 საათზე განიცადა. მომხდარის გამო დონის როსტოვის აეროპორტიდან სხვა ავიარეისები გადაიდო.

ლაინერი დუბაიდან როსტოვის მიმართულებით ასრულებდა რეისს.

რუსეთის პრეზიდენტმა, ვლადიმერ პუტინმა მწუხარება გამოთქვა დონის როსტოვში მომხდარი ავიაკატასტროფის შედეგად დაღუპულების გამო. რუსული მედიის ცნობით, მან რუსეთის ავიაციას და როსტოვის რეგიონის გუბერნატორს ასევე, საგანგებო სიტუაციების სამინისტროს დაავალა გააკეთონ ყველაფერი დაღუპულთა ოჯახების დასახმარებლად.

ამ დროისთვის კატასტროფის ადგილას მიმდინარეობს სამძებრო და გაწმენდითი სამუშაოები, ადგილზე იმყოფება ტრანსპორტის მინისტრი, საგანგებო სიტუაციების მინისტრი, საჰაერო ტრანსპორტის ფედერალური სამსახურის წარმომადგენელი და პრეზიდენტის წარმომადგენელი სამხრეთის ფედერალურ ოლქში. ამასთან, დონის როსტოვის აეროპორტში მისულ დაღუპულთა ახლობლებს დახმარებს ათობით ფსიქოლოგი უწევს.

რაც შეეხება კომპენსაციის საკითხს, რუსეთის საჰაერო ტრანსპოროტის ფედერალური სამსახური უკვე დაუკავშირდა კომპანია Fly Dubai-ის წარმომადგენლებს კომპენსაციის საკიღხზე. პარალელურად, თავად კომპანია Fly Dubai-ის ხელმძღვანელობამ მომხდართან დაკავშირებით შეიმუშავა სწრაფი რეაგირების გეგმა და მზად არის იმუშაოს რუსეთის შესაბამის სამსახურებთან.

აღსანიშნავია, რომ კომპანია Fly Dubai-ი 2009 წელს დუბაიში დაარსდა და იგი დღეს 90 მიმართულებით ასრულებს რეისებს.