ლას-ვეგასში ქალმა კრიშტიანუ რონალდუ სექსუალურ ძალადობაში საჯაროდ დაადანაშაულა.

CNN-ის ინფორმაციით, კლარკის ოლქის სასამართლოში პარასკევს შეტანილ სარჩელში ქეთრინ მაიორგა ამბობს, რომ პორტუგალიელმა ფეხბურთელმა ის 2009 წლის ივნისში ლას-ვეგასში ერთ-ერთ სასტუმროში გააუპატიურა.

სარჩელში ნათქვამია, რომ თავდასხმის შემდეგ რონალდუმ ბოდიში მოიხადა, თქვა, რომ მომხდარის გამო წუხდა და რომ ის, როგორც წესი, ჯენტლმენობით გამოირჩევა.

სარჩელის თანახმად, მაიორგა პორტუგალიელ ფეხბურთელსა და "პერსონალური რეპუტაციის დაცვის სპეციალისტთა გუნდს" მისი მოწყვლადი ემოციური მდგომარეობის გამოყენებაში ადანაშაულებს, რა დროსაც მისი თქმით, 2009 წელს ის აიძულეს შეთანხმება გაეფორმებინა, რომლის მიხედვითაც მას მომხდართან დაკავშირებით არაფერი უნდა ეთქვა. ქეთრინ მაიორგა ირწმუნება, რომ მან დუმილის სანაცვლოდ 375 ათასი დოლარი მიიღო.

თავისი სარჩელით ის შეთანხმების ბათილად ცნობას ითხოვს.

მაიორგას ადვოკატმა CNN-ს სარჩელთან დაკავშირებით დამატებითი ინფორმაციის მიწოდებაზე უარი განუცხადა.

რონალდუს წარმომადგენლებმა სექსუალური ძალადობის შესახებ არსებული ბრალდება ჯერ კიდევ 2017 წელს უარყვეს, როდესაც აღნიშნული ბრალდების შესახებ გერმანულმა გამოცემა Der Spiegel-მა დაწერა.

რონალდუმ ბრალდებას ინსტაგრამზე უპასუხა და განაცხადა: "რაც მათ დღეს თქვეს, მცდარი ამბავია. მათ ჩემი სახელის გამოყენებით თავის გამოჩენა სურთ. ეს ნორმალურია. მათ უნდათ ცნობილები იყვნენ - იმით რომ ჩემს სახელს ამბობენ. ეს სამუშაოს ნაწილია. მე ბედნიერი ადამიანი ვარ".