კათოლიკური სამყარო დღეს ვნების კვირეულის დიდ ხუთშაბათს აღნიშნავს. ქრისტიანული ტრადიციის მიხედვით, ამ დღეს მაცხოვარმა მოციქულებს ფეხები დაბანა.

რომის პაპმა უძველესი ქრისტიანული ცერემონია რომის სიახლოვეს მდებარე მიგრანტთა დროებითი მიღების ცენტრში, კასტელნუოვო დი-პორტოში ჩაატარა.

მან ფეხები 11 ლტოლვილსა და ერთ იტალიელს დაბანა.

ადგილობრივი მედიის ცნობით, მორწმუნეებს შორის 5 კათოლიკე, სამი მუსლიმი, სამი ეგვიპტელი ქრისტიანი და ერთი ინდუისტი იყვნენ.

ცერემონიის დროს მან გაიხსნენა ბრიუსელში მომხდარი სისხლიანი ტერაქტები და აღნიშნა, რომ ამ მოვლენების უკან, ისევე როგორც იუდას საქციელის უკან სხვა ადამიანები იდგნენ.

"იუდას უკან იყვნენ ისინი, ვინც მას ფული მისცა. ამ მოვლენების უკან კი იარაღის მწარმოებლები და მევაჭრეები დგანან", - განაცხადა პაპმა.

პონტიფიკოსმა ლტოლვილთა დროებით თავშესაფარში, სადაც ამჟამად 900-მდე მიგრანტი იმყოფება, მესა აღავლინა, ასევე შეხვდა რამდენიმე ლტოლვილ ოჯახს ერიტრეასა და პალესტინიდან.

ქადაგების დროს პაპმა მშვიდობისა და ძმობის მნიშვნელობაზე ისაუბრა.

"დღეს ჩვენ ყველანი ვამბობთ: "ჩვენ განსხვავებულები ვართ, გვაქვს კულტურული და რელიგიური სხვაობა, მაგრამ ყველანი ძმები ვართ და მშვიდობით გვინდა ცხოვრება. ყველა თქვენგანს საკუთარი ისტორია, საკუთარი ჯვარი, ბევრი ტკივილი აქვს, მაგრამ ამავე დროს აქვს ღია გული, რომელსაც ძმობა სურს. ყველა თავის რელიგიურ ენაზე სთხოვს უფალს, რომ ეს ძმობა მთელ მსოფლიოში გავრცელდეს. დაე ასე იყოს", - განაცხადა პაპმა.

როგორც იტალიური პრესა წერს, მიგრანტებს სააღდგომო კვეცხები, ასევე საჩუქრები დაურიგეს.