ლარნაკას აეროპორტში თვითმფრინავის გამტაცებელმა სავარაუდოდ, ყველა მძევალი გამოუშვა. თვითმფრინავში კი მხოლოდ გამტაცებელი რჩება. ამის შესახებ "ბიბისი" იტყობინება.

წინასწარი ინფორმაციით, თვითმფრინავის გატაცება პირად მოტივებს უკავშირდება, კერძოდ, გამტაცებელმა, რომლის სახელია იბრაჰიმ სამაჰა, თავის ყოფილ მეუღლესთან შეხვედრა მოითხოვა, რომელიც ლარნაკას აეროპორტთან ახლოს ცხოვრობს.

გავრცელებული ცნობით, ყოფილი მეუღლე აეროპორტში უკვე ჩაიყვანეს.

ცოტა ხნის წინ კვიპროსის პრეზიდენტმა ნიკოს ანასტასიადისმა ინციდენტთან დაკავშირებით პირველი განცხადება გააკეთა და აღნიშნა, რომ გამტაცებლის მოტივები ტერორისტული ხასიათის არ იყო, არამედ ქალს უკავშირდება.

გამტაცებელმა ლაინერის ეკიპაჟს ჩასვლა კვიპროსის ლარნაკას აეროპორტში უბრძანა, რომლის სიახლოვესაც, "ბიბისის" ცნობით, მისი ყოფილი მეუღლე ცხოვრობს.

გამოცემა "ტელეგრაფის" ინფორმაციით კი, გამტაცებელი აშშ-ის ატლანტას უნივერსიტეტში სწავლობს და სამედიცინო ფაკულტეტის სტუდენტია.

გატაცების დროს თვითმფრინავში 80-ზე მეტი ადამიანი იმყოფებოდა.

ავიაკომპანია Egyptair-ის კუთვნილი სამგზავრო თვითმფრინავი A320-ის გატაცებაზე ინფორმაცია ცოტა ხნის წინ გავრცელდა.

მომხდარის გამო, ამ დროისთვის ლარნაკას აეროპორტი დახურულია. ყველა თვითმფრინავი კვიპროსის სამხრეთ-დასავლეთში მდებარე პაფოსის აეროპორტში ჩადის.