ჩვეულებრივი ტკივილგამაყუჩებლების ინტენსიური მიღება გულის უკმარისობას იწვევს- აღნიშნულ დასკვნამდე The British Medical Journal-ში გამოქვეყნებული კვლევის ავტორები მივიდნენ.

საფრთხეს, ძირითადად, არასტეროიდული ანთების საწინააღმეგო პრეპარატები იწვევს - გამაყუჩებლები, რომლებიც თითქმის ყველა ოჯახშია.

აღნიშნულ კატეგორიას ისეთი პოპულარული ტკივილგამაყუჩებლები მიეკუთვნება, როგორიც იბუპროფენი, ნაპროქსენი და დიკლოფენაკია. ჩამოთვლილი პრეპარატები, ხშირად, სხვადასხვა სავაჭრო დასახელებით იყიდება, მაგალითად, ნუროფენი ვოლტარენი და სხვა.

კვლევაში, რომელიც მილანის უნივერსიტეტში ჩატარდა, 10 მილიონი ადამიანის მონაცემებია გაანალიზებული, რომლებიც აღნიშნულ პრეპარატებს ინტენსიურად იღებდნენ.

კვლევაში მონაწილეთა საშუალო ასაკი 77 წელი იყო. მათ შორის გაერთიანებული სამეფოს, ნიდერლანდების, იტალიისა და გერმანიის მოქალაქეები იყვნენ. მკვლევარებმა მათი მონაცემები იმ ადამიანების მონაცემებს შეადარეს, რომლებიც მსგავსი დასახელების ტკივილგამაყუჩებლებს არ იყენებდნენ ან იშვიათად იყენებდნენ.

მკვლევარებმა დაადგინეს, რომ ამ ტიპის პრეპარატების მიღების შემთხვევაში გულის უკმარისობის შანსი 19 %-ით იზდება.

გულის დაავადებებთან ბრძოლის ბრიტანული ფონდის ექსპერტები პაციენტებს არასტეროიდული ანთების საწინააღმეგო პრეპარატების მიღებისგან თავის შეკავებას სთხოვენ და მათი გამოყენების შემთხვევაში ხანგრძლივი ინტერვალის დაცვისკენ მოუწოდებენ, განსაკუთრებით იმ დროს თუ მათ უკვე აწუხებთ გულთან დაკავშირებული პრობლემები.