ამერიკის შეერთებული შტატების ქალაქ დალასში საპროტესტო აქციის მიმდინარეობისას სამართალდამცავებზე მომხდარი თავდასხმის შედეგად ხუთი პოლიციელი გარდაიცვალა. 6 მათგანი კი მძიმედ არის დაშავებული. მედიკოსების ინფორმაციით, რამდენიმე მათგანი კრიტიკულ მდგომარეობაში იმყოფება.

პოლიციის თანამშრომლებმა თავდამსხმელების წინააღმდეგ სპეცოპერაცია წამოიწყეს, რომლის შედეგადაც 3 ეჭვმიტანილი დააკავეს. ამ დრომდე არსებული ინფორმაციით, პოლიციის თანამშრომლებზე თავდასხმა ორმა ადამიანმა სნაიპერული იარაღიდან განახორციელა, ამიტომ სამართალდამცავები ყველა დაკავებულის ბრალეულობაში დარწმუნებულები არ არიან.

დალასში საპროტესტო აქციის დროს ოთხი პოლიციელი მოკლეს

დალასის პოლიციის განყოფილების უფროსის დევიდ ბრაუნის განმარტებით, ამ დროისთვის პოლიციის თანამშრომლები შემთხვევის ადგილთან ახლოს, ფარეხში გამაგრებულ შეიარაღებულ მამაკაცთან მოლაპარაკებას აწარმოებენ.

"ეჭვმიტანილი, რომელთანაც მოლაპარაკებას ვაწარმოებთ, აცხადებს, რომ მისი მიზანი, რაც შეიძლება მეტი სამართალდამცავის დაშავება და მოკვლაა. ეჭვმიტანილმა პოლიციის თანამშრომლებთან საუბარში ასევე თქვა, რომ ქალაქის ცენტრში ზოგიერთი ადგილი ისევე, როგორც ეს ფარეხი დანაღმულია"- განაცხადა დევიდ ბრაუნმა.

ამერიკის შეერთებული შტატები საპროტესტო აქციებმა მიმდინარე კვირას მოიცვა.

ქვეყნის მსხვილი ქალაქების მოსახლება სამართალდამცავების მხრიდან აფრო-ამერიკელების მოკვლის ფაქტს აპროტესტებს.

პოლიციელების მხრიდან ძალადობის ამსახველი ვიდეო მასალა ოთხშაბათსა და ხუთშაბათს გამოქვეყნდა.

"ჩვენ მასწავლებლები ვართ და ვზრუნავთ ჩვენს ბავშვებზე, იმიტომ რომ მათი სიცოცხლე მნიშვნელოვანია, ისევე როგორც აფრო-ამერიკელი ბავშვების სიცოცხლე. დიფერენცირება დანაშაულად მიგვაჩნია. სწორად ამიტომ ვდგავართ აქ, რადგან მივიჩნევთ, რომ სისტემა უსამართლოა. ეს ინსტიტუციური რასიზმია, რომელიც ჩვენი ბავშვების წინააღმდეგაა მიმართული."- განაცხადა აქციის-ერთ ერთმა მონაწილემ, რომელმაც ანონიმურობის დაცვა მოითხოვა.

აღნიშნულ საკითხს ქვეყნის პრეზიდენტი ბარაკ ობამაც გამოეხმაურა. თეთრი სახლის ლიდერის განმარტებით, სამართალდამცავების მხრიდან აფრო-ამერიკელების წინააღმდეგ გახშირებული ძალადობის ფაქტები ყველა ამერიკელის პრობლემაა.

"ეს მხოლოდ აფრო-ამერიკელებისა და ლათინოამერიკელების პრობლემა არ არის.

ეს სრულად ამერიკასა და ყველა ჩვენგანს გვეხება. საკითხი სწრაფ მოგვარებას საჭიროებს. როდესაც მსგავსი ფაქტები ხდება ჩვენი ქვეყნის მოქალაქეები ფიქრობენ, რომ ძალადობის რეალური მიზეზი კანის ფერი და მსხვერპლის წარმომავლობაა - ეს საწყენია"- განაცხადა ბარაკ ობამამ.

საწყენია თუ არა ფაქტი ერთია - 2015 წლის სტატისტიკური მონაცემების მიხედვით, მთელი წლის განმავლობაში პოლიციის თანამშრომლებმა სულ მცირე 102 შეუიარაღებელი აფრო-ამერიკელი მოკლეს, რაც სამართალდამცავთა მიერ მოკლული შეუიარაღებელი ადამიანების 37%-ს შეადგენს, იმ პირობებში, როდესაც აფრო-ამერიკული თემი მოსახლეობის, სულ რაღაც, 13%-ს წარმოადგენს.

რეალურად, აფრო-ამერიკელების მკვლელობის ფაქტი თეთრკანიანთა მკვლელობას 5-ჯერ აღემატება.

სტატისტიკა ცხადყოფს, რომ 102 შემთხვევიდან სამართალდამცავთა პასუხისმგებლობა მხოლოდ 10 შემთხვევაში დადგა.

შესაძლოა, პოლიციის მხიდან ძალადობის ფაქტები მსხვერპლთა კანის ფერს არ უკავშირდება, მაგრამ ამ დროისთვის არც რეალური მიზეზი არ არის გამოკვლეული.