ეგვიპტის პოლიციამ დააკავა მამაკაცი, რომელიც ბავშვების გამოყენებით დადგმულ კადრებს იღებდა, შემდეგ კი ამ ფოტოებს სოციალურ ქსელში ალეპოში გადაღებულ ფოტომასალად ასაღებდა.

როგორც ქვეყნის შსს Facebook-ის ოფიციალურ გვერდზე იუწყება, პროვინცია პორტ-საიდში დაკავებულია გადამღები ჯგუფი, რომლის შემადგენლობაში ფოტოგრაფი, მისი თანაშემწეები და პატარა მსახიობების მშობლები შედიოდნენ.

პოლიცია საკუთარი თვალით შეესწრო გადაღების პროცესის მიმდინარეობას, რომელიც ხელისუფლების მიერ დანგრეული უკანონო ნაგებობის ადგილზე ხდებოდა. პატრულირების დროს ერთ-ერთი პოლიციელის ყურადღება დასისხლიანებულ თეთრ კაბაში გამოწყობილმა არასრულწლოვანმა გოგონამ მიიპყრო. "სისხლი", როგორც ძალოვანებმა დაადგინეს, ჩვეულებრივი საღებავი აღმოჩნდა.

ფოტოგრაფმა პოლიციას უამბო, რომ ამ სურათების სოციალურ ქსელებში განთავსება და ალეპოში გადაღებულ კადრებად გასაღება უნდოდა.

ფოტოგრაფი პოლიციამ 4 დღით, ინციდენტის გარკვევამდე დააკავა, გადამღები ჯგუფის დანარჩენი სრულწლოვანი წევრები კი გირაოს გადახდის შემდეგ გათავისუფლდნენ.