ევროპა ბოლო რამდენიმე წლის განმავლობაში მნიშვნელოვნად დააზიანა კრიზისმა, დიდი ბრიტანეთის გასვლა ევროკავშირიდან რეგიონს კიდევ უფრო მეტად აზარალებს. ცოტა ხნის წინ იტალიაში ჩატარებული რეფერენდუმი უკვე ყოფილი პრემიერის, მატეო რენცის საწინააღმდეგო შედეგით დასრულდა, რაც ანალიტიკოსების მოსაზრებით, ქვეყანაში ევროსკეპტიკოსების გაძლიერებას გამოიწვევს.

წელს, ნიდერლანდებში, საფრანგეთსა და გერმანიაში არჩევნებია დაგეგმილი, რამაც "სიენენის" ანალიტიკოსის მოსაზრებით, ამ ქვეყნებშიც შესაძლოა, მკვეთრად შეცვალოს ვითარება. ნიდერლანდების პარლამენტში ყველაზე მსხვილი პარტია შესაძლოა, ევროკავშირის მოწინააღმდეგეთა პარტია გახდეს.

ამასთან, ევროპის ცალკეულ ქვეყნებში პოპულისტური ძალები ძლიერდებიან. საფრანგეთის ეროვნული ფრონტის ლიდერის, მარინ ლე პენის მხარდამჭერების რაოდენობა მატულობს.

ეს ყველაფერი კი იმაზე მიუთითებს, რომ საფრთხე ექმნება ევროინტეგრაციას. ამასთან, საფრთხის წინაშეა ევროკავშირის ვალუტის, ევროს მომავალიც.

გასულ კვირას, დავოსის მსოფლიოს ეკონომიკურ ფორუმზე სიტყვით გამოსვლისას, ჯორჯ სოროსმა განაცხადა, რომ ევროკავშირის დაშლის პროცესისთვის წინააღმდეგობის გაწევა რთული იქნება. JP Morgan-ის აღმასრულებელი დირექტორის, ჯემი დაიმონის თქმით კი ევროზონა ვერ გადარჩება.

"ეს ევროპელი ხალხის უპატივცემულობა იქნება, მათ სიტუაცია უნდა შეცვალონ. შესაძლოა, ეს პოლიტიკის საშუალებით მოხდეს, ან ახალი ხელმძღვანელობის", - განაცხადა დაიმონმა.

ანალიტიკოს ნიგარ ვუდსის მოსაზრებით, ამ კუთხით რადიკალური ცვლილებები არ არის მოსალოდნელი:

"ევროზონის კრიზისმა ევროკავშირი კრედიტორებსა და დებეტორების მხარეებად დაყო და ძირი გამოუთხარა ერთმანეთის მიმართ სოლიდარობას, რაც მანამდე არსებობდა".

ამას გარდა, ევროკავშირიდან ბრიტანეთის გასვლის პროცესი, რომელიც ორ წელიწადში უნდა დასრულდეს, დიდ დროს და რესურსს მოითხოვს და ევროკავშირში განსახორციელებელი რეფორმებისთვის ლიდერებს ცოტა დრო დარჩებათ.

ევროპაში მიმდინარე პროცესების შესაჩერებლად, საჭირო ქმედებები დავოსის ფორუმზე ევროკომისიის პირველმა ვიცეპრეზიდენტმა, ფრანს ტიმერმანსმა შეაჯამა. მისი თქმით, "ჩვენ უნდა მოვემზადოთ მომავლისთვის, წინააღმდეგ შემთხვევაში ვერ განვვითარდებით".