საბოლოო მონაცემებით, საფრანგეთის საპრეზიდენტო არჩევნების მეორე ტურში პოლიტიკური მოძრაობა "წინ"-ის ლიდერმა ემანუელ მაკრონმა გაიმარჯვა. მან ამომრჩეველთა ხმების 66,06% მიიღო.

"ეროვნული ფრონტის" ლიდერმა მარინ ლე პენმა კი ამომრჩეველთა ხმების 33,94% მიიღო.

საფრანგეთისთვის ახალი გვერდი გადაიშალა, - განაცხადა საფრანგთის არჩეულმა პრეზიდენტმა ემანუელ მაკრონმა "ფრანს პრესისთვის" მიცემულ ინტერვიუში.

ემანუელ მაკრონის თქმით, მას სურს, რომ იმედი და ნდობა, რომელიც მიიღო, გაამართლოს.

"მე დავიცავ საფრანგეთს, მის სასიცოცხლო ინტერესებს", - განაცხადა საფრანგეთის არჩეულმა პრეზიდენტმა ემანუელ მაკრონმა.

"მე თქვენს წინაშე ვალდებულებებს ვიღებ. მე დავიცავ ევროპას, ეს ჩვენი ცივილიზაციაა. მე გავაძლიერებ ევროპასა და მის მოქალაქეებს შორის კავშირებს. მე მსოფლიოს ერებს მივმართავ და მათ საფრანგეთის ძმურ მისალმებას ვუგზავნი", - განაცხადა ემანუელ მაკრონმა.

"ამ საღამოს მინდა ასევე მივესალმო ჩემს მოწინააღმდგეს. ვიცი, რომ ჩვენს ერში დაყოფამ ზოგიერთები მიიყვანა იქამდე, რომ ხმა ულტრამემარჯვენეებს მისცეს. მე ვიცი ის ეჭვები, აღშფოთება, რაც ზოგიერთმა გამოხატა. ჩემი ვალდებულებაა თქვენ მოგისმინოთ და ვებრძოლო უთანასწორობის ყველა ფორმას, რათა უზრუნველვყო თქვენი უსაფრთხოება და ჩვენი ერის ერთიანობა", - აღნიშნა მაკრონმა.

საფრანგეთში გუშინ საპრეზიდენტო არჩევნების მეორე ტური გაიმართა. საფრანგეთის რიგით მე-11 საპრეზიდენტო არჩევნების პირველი ტური 23 აპრილს ჩატარდა. თავდაპირველად საპრეზიდენტო არჩევნებში 11 დარეგისტრირებული კანდიდატი მონაწილეობდა.

საფრანგეთის საკონსტიტუციო საბჭოს მიერ დამტკიცებული შედეგებით, არჩევნების პირველ ტურში ემანუელ მაკრონმა ამომრჩეველთა ხმების 24,01%-ით პირველი ადგილი დაიკავა, ხოლო მარინ ლე პენი - 21,30%-ით მეორე ადგილზე გავიდა.