ემანუელ მაკრონი და დონალდ ტუსკი მთავარ ამოცანად ევროკავშირის გაძლიერებას მიიჩნევენ | Allnews.Ge

საფრანგეთის პრეზიდენტი ემანუელ მაკრონი და ევროკავშირის საბჭოს თავმჯდომარე დონალდ ტუსკი მთავარ ამოცანად ევროკავშირის გაძლიერებას მიიჩნევენ. აღნიშნულის შესახებ მხარეებმა ელისეს სასახლეში გამართულ ერთობლივ პრესკონფერენციაზე განაცხადეს.

"ბერლინში ჩემი ვიზიტის დროს მოლაპარაკებები გავმართე გერმანიის კანცლერ ანგელა მერკელთან და მას განვუცხადე ჩემი განზრახვის შესახებ, რომ ევროკავშირი უფრო უნდა იცავდეს თავისი წევრი ქვეყნების მოქალაქეებს, ნაკლებად ბიუროკრატიული იყოს და უფრო მარტივ პროცედურულ მექანიზმებს ფლობდეს. ასევე მიზანი მაქვს ევროზონის უფრო მეტ ინტეგრაციას მივაღწიოთ და გავატაროთ პოლიტიკა, რომელიც ხელს შეუწყობს ინვესტიციების განხორციელებას", - განაცხადა საფრანგეთის პრეზიდენტმა.

ემანუელ მაკრონმა ასევე აღნიშნა, რომ "საჭიროა უფრო ამბიციური გეგმის შემუშავება ევროკავშირის საბჭოს საგარეო პოლიტიკის რეფორმებთან დაკავშირებით".

საფრანგეთის პრეზიდენტის თქმით, "ევროკავშირის საბჭოს როლი გადამწყვეტია ისეთ საკითხებში როგორიც არის: კლიმატი, საერთშორისო ვაჭრობა, საგარეო პოლიტიკა, მნიშვნელოვანი საერთაშორისო საკითხები".

"ჩემთვის დიდი მნიშვნელობა აქვს ევროკავშირის პროექტს, შესძლებლობას ვიმუშავო ევროკავშირის ინსტიტუტებთან. მე დონალდ ტუსკის და მისი ლიდერობის დიდი იმედი მაქვს, რათა უფრო წინ წავიდეთ ევროკავშირის გარდაქმნის კუთხით", - აღნიშნა ემანუელ მაკრონმა.

თავის მხრივ, დონალდ ტუსკმა განაცხადა, რომ "ევროპას სჭირდება ემანუელ მაკრონის ენერგია, წარმოსახვა და გამბედაობა".

"როდესაც მე ვამბობ ევროპა, ვგულისხმობ არა ევროოკავშირის ინსტიტუტებს, არამედ მილიონობით ევროპელს, რომელიც თქვენს გამარჯვებას იმედის ნიშნად აღიქვამს. მაგრამ ეს ასევე ევროკავშირისთვისაც არის იმედის ნიშანი", - აღნიშნა დონალდ ტუსკმა.

"დღევანდელ მოლაპარაკებებზე ჩვენ განვიხილეთ ევროკავშირის მომავლის საკითხი, მაგრამ არ გვისაუბრია "ბრექსითის" პროცესზე", - დასძინა ევროკავშირის საბჭოს თავმჯდომარემ.