ექვსი ქვეყნის მიერ დიპლომატიური კავშირების გაწყვეტის გადაწყვეტილებამ ყატარის მოსახლეობაში პანიკა გამოიწვია. ადამიანებმა მასობრივად დაიწყეს საკვები პროდუქტების მომარაგება, ვინაიდან შიშობენ, რომ ქვეყანაში წყლისა და საკვების დეფიციტი დაიწყება.

საუდის არაბეთი, ეგვიპტე, ბაჰრეინი, არაბთა გაერთიანებული საემიროები, ლიბია და იემენი ყატარს რეგიონის დესტაბილიზაციაში სდებენ ბრალს. მათი განცხადებით, ეს ქვეყანა მხარს უჭერს ე.წ ისლამურ სახელმწიფოსა და ალქაიდას, რასაც ყატარი უარყოფს. აღსანიშნავია, რომ ზემოთ აღნიშნული, 6 ქვეყანა აშშ-ის მოკავშირეა და მათი გადაწყვეტუილება სპარსეთის ყურის ქვეყნებს შორის პირველი ყველაზე მსხვილი დაპირისპირებაა.

ბაჰრეინის საგარე საქმეთა სამინისტროში ასევე აღნიშნეს, რომ საზღვაო და საჰაერო მიმოსვლა ყატართან დაიხურება, ხოლო ყატარის დიპლომატებმა ბაჰრეინის ტერიტორია 48 საათის განმავლობაში უნდა დატოვონ. ასევე ბაჰრეინი ყატარის ყველა მოქალაქემ უნდა დატოვოს და ამისთვის მათ 14 დღე ეძლევათ.

ყატარი ექვსი სახელმწიფოს გადაწყვეტილებას დიპლომატიური ურთიერთობების გაწყვეტის შესახებ, გაუმართლებლად მიიჩნევს. აღნიშნულის შესახებ ყატარის საგარეო საქმეთა სამინისტროში განაცხადეს.

"ყატარი გადაწყვეტილებას დიპლომატიური ურთიერთობების გაწყვეტის შესახებ გაუმართლებლად მიიჩნევს. ყატარის ხელისუფლება ყველაფერს გააკეთებს, რათა აღნიშნულმა გავლენა არ მოახდინოს ქვეყნის ეკონომიკაზე", - ნათქვამია ყატარის საგარეო უწყების განცხადებაში.

ყატარის საგარეო საქმეთა სამინისტროში უარყვეს ბრალდებები ტერორისტული და რადიკალური დაჯგუფებების მხარდაჭერასთან დაკავშირებით და აღნიშნეს, რომ ყატარი მხარს უჭერს მეზობელი ქვეყნების სუვერენიტეტს.