ექსკლუზიური დოკუმენტაცია ყატარის კრიზისის მიზეზებს ააშკარავებს | Allnews.Ge

საერთაშორისო საზოგადოება სპარსეთის ყურეში უკანასკნელ პერიოდში ერთ-ერთ ყველაზე მძაფრ დიპლომატიურ კონფლიქტს ადევნებს თვალს. მეზობელმა ქვეყნებმა ყატარი ლიბანელ შიიტთა დაჯგუფება ჰეზბოლასა და ტერორისტული ორგანიზაციების დაფინანსებაში დაადანაშაულა. დოჰას ბრალი მუსლიმი ძმების მხარდაჭერაშიც დასდეს.

CNN-ს საიდუმლო ხელშეკრულება ჩაუვარდა ხელში, რომელსაც აღნიშნული დიპლომატიური კონფლიქტის წარმოშობის მიზეზების ახსნა შეუძლია.

როგორც აღმოჩნდა, ყატარმა 2013-2014 წლებში სპარსეთის ყურის სხვა ქვეყნებთან საიდუმლო შეთანხმებები გააფორმა. შეთანხმება ამ ქვეყნებში, ასევე ეგვიპტესა და იემენში, ოპოზიციური და მტრული დაჯგუფებების დახმარებას კრძალავდა.

დოკუმენტების არსებობა ცნობილი იყო, თუმცა მისი შინაარსი ისევე როგორც თავად დოკუმენტი საიდუმლოდ რჩებოდა.

პირველი შეთანხმება 2013 წლის 23 ნოემბრით თარიღდება. მას ხელი საუდს არაბეთის მეფემ, ყატარისა და ქუვეითის ამირებმა მოაწერეს. შეთანხმებაში მკაფიოდ არის მითითებული რომ სპარსეთის ყურის არც ერთი ქვეყანა არ უნდა ჩაერიოს მისი მეზობლის საშინაო საკითხებში, გარდა ამისა, დოკუმენტით აიკრძალა ხელისუფლებასთან დაპირისპირებული ძალების ფინანსური და პოლიტიკური მხარდაჭერა.

2013 წელს გაფორმებული ხელშეკრულებით, მხარეები ასევე შეთანხმდნენ მხარი არ დაეჭირათ ანტაგონისტური მედია საშუალებისთვის. სავარაუდოა, რომ ამ პუნქტზე მსჯელობისას ყატარის მეზობლებს სწორება ალ-ჯაზირაზე ჰქონდათ, რომელსაც ისინი რეგიონში მოქმედი ოპოზიციური ჯგუფების იდეების გახმოვანებაში ადანაშაულებდნენ. საინტერესოა, რომ არც პირველ და არც მეორე ხელშეკრულებაში, საუდის არაბეთის მფლობელობაში მყოფ მედიასაშუალება ალ-არაბიაზე საუბარი არ ყოფილა.

მეორე შეთანხმება მეტად გასაიდუმლოებულ პირობებში, 2014 წლის 16 ნოემბერს დაიდო. ამჯერად მას ხელი დამატებით, ბაჰრეინის მეფემ, აბუ დაბის პრინცმა და არაბეთის გაერთიანებული საამიროების პრემიერ-მინისტრმა მოაწერეს. ის ეგვიპტეში სტაბილურობისა და რეგიონში სიმშვიდის შენარჩუნებას ემსახურებოდა.

ეს პირობები სპარსეთის ყურის ქვეყნებმა ყატართან ურთიერთობის გაუმჯობესების მიზნით წამოაყენეს.

სპარსეთის ყურის ქვეყნები ყატარს სწორედ, 2013-2014 წლებში მიღწეული შეთანხმების შეუსრულებლობაში ადანაშაულებენ. თავად ყატარი ამ ბრალდებას უარყოფს. CNN-ისთვის მიცემულ კომენტარში ყატარის სახელმწიფო კომუნიკაციების სამსახურის უფროსი ამბობს, რომ შეთანხმების სული თავად საუდის არაბეთმა და არაბეთის გაერთიანებულმა საამიროებმა გატეხეს.

ყატარის სახელმწიფო კომუნიკაციების სამსახურის უფროსის განმარტებით, 2013-2014 წლების ხელშეკრულებების სრულად წაკითხვა ცხადჰყოფს, რომ შეთანხმების ძირითადი მიზეზი სპარსეთის ყურის ქვეყნების მკაფიო ჩარჩოებში თანამშრომლობა იყო.

"მოთხოვნები, რომ ყატარმა უნდა დახუროს ალ-ჯაზირა, დაანგრიოს ოჯახები და გადაიხადოს კომპენსაცია" არანაირად არ უკავშირდება ჩვენ მიერ დადებულ ხელშეკრულებებს. გარდა ამისა, საუდის არაბეთმა და არაბეთის გაერთიანებულმა საამიროებმა არ გამოიყენეს არც ერთი მექანიზმი, რომ ყატარისთვის მათი უკმაყოფილების შესახებ ეცნობებინათ", - განაცხადა ყატარის სახელმწიფო კომუნიკაციების სამსახურის უფროსმა.

ალ-ტანის მტკიცებით, ოფიციალური დოჰასთვის წარდგენილი მოთხოვნათა ნუსხა, დაუსაბუთებლად და უპრეცედენტოდ არღვევდა ქვეყნის სუვერენიტეტს. სწორედ ეს გახდა მიზეზი იმის, თუ რატომ თქვა ყატარმა მათ შესრულებაზე უარი.

"ეს კრიზისი ჰაკერების თავდასხმის, მტკიცებულებების ფაბრიკაციისა და კოორდინირებული მედია კამპანიის შედეგია. საუდის არაბეთსა და არაბეთის გაერთიანებულმა ემირატებს თავიდანვე ჰქონდათ ფაქტების დამალვის მცდელობა, მათ შორის, საკუთარი მოქალაქეებისთვის, სწორედ ამით არის გამოწვეული, რომ მათ ალ-ჯაზირასა და სხვა მედია საშუალებების მაუწყებლობა ქვეყნის ფარგლებს შიგნით დაბლოკეს"-განაცხადა ალ-ტანიმ.