მერილენდში წყალდიდობის გამო საგანგებო მდგომაერეობაა გამოცხადებული. თვითმხილველების მიერ გადაღებულ ვიდეო- და ფოტომასალაზე ჩანს, რომ მერილენდ სითისა და ელიკოტ სითის მთავარ ქუჩებზე წყალი მდინარესავით მოედიანება. თვითმხილველთა თქმით, წყალმა საცხოვრებელი სახლების პირველ სართულს მიაღწია და ქუჩაში პარკინგზე დაყენებული ავტომობილები წაიღო. წყალდიდობა ძლიერმა წვიმამ გამოიწვია.

მიუხედავად იმისა, რომ მოცემული მომენტისთვის წყლის დონემ იკლო, საგანგებო სიტუაციების მართვის სამსახურში არ აქვთ ზუსტი ინფორმაცია დაღუპულთა და დაშავებულთა შესახებ. თუმცა ისინი განაგრძობენ პატრულირებას, რათა დარწმუნდნენ, რომ სტიქიის ზონიდან ყველა მოქალაქის ევაკუაცია განხორციელდა.

წყალდიდობამ მერილენდი 2016 წელსაც დააზიანა. ადგილობერივების განმარტებით, გუშინ თავს დამტყდარი სტიქია გაცილებით ძლიერი იყო, ვიდრე 2016 წლის წყალდიდობა, რომელსაც 2 ადამიანის სიცოცხლე ემსხვერპლა და ბიზნეს სექტორი მნიშვნელოვნად დააზარალა.