კალიფორნიის შტატის ყოფილი გუბერნატორი, მსახიობი არნოლდ შვარცენეგერი მიიჩნევს, რომ რუსეთის პრეზიდენტთან შეხვედრის შემდეგ გამართულ პრესკონფერენციაზე დონალდ ტრამპი, როგორც დოყლაპია, ისე გამოიყურებოდა.

მისი თქმით, ერთობლივ პრესკონფერენციაზე აშშ-ს პრეზიდენტის გამოსვლა სამარცხვინო იყო.

"პრესკონფერენციაზე როგორც დოყლაპია, ისე იდექით. ჩემს თავს ვეკითხებოდი, როდის გამოართმევდით პუტინს ავტოგრაფს ან მასთან სელფის გადაიღებდით", - ნათქვამია არნოლდ შვარცენეგერის ვიდეომიმართვაში.

არნოლდ შვარცენეგერის აზრით, დონალდ ტრამპმა უღალატა ამერიკის დაზვერვას, მართლსაჯულების სისტემასა და ქვეყანას მთლიანობაში.

"თქვენ აშშ-ს პრეზიდენტი ბრძანდებით. ასე არ უნდა მოიქცეთ. რა დაგემართათ? რა დაემართა რონალდ რეიგანის იმ სიტყვებსა და ძალას, როდესაც ის ბერლინის კედელთან იდგა და გორბაჩოვს უთხრა: "ჩამოშალეთ ეს კედელიო"?, - დასძინა მან.

აღსანიშნავია, რომ არნოლდ შვარცენეგერი "რესპუბლიკური" პარტიის წევრია.