ვისი სჯერა ტრამპს? - პუტინთან შეხვედრას აშშ-ში უკმაყოფილება მოჰყვა | Allnews.Ge

ჰელსინკში დონალდ ტრამპისა და ვლადიმერ პუტინის მიერ გაკეთებულ განცხადებებს ორმხრივ ურთიერთობაში გარღვევა არ მოუხდენია.  შეხვედრამ ამერიკის შეერთებული შტატების საპრეზიდენტო არჩევნებში რუსეთის ჩარევის შესახებ ბრალდებების ფონზე ჩაიარა, თუმცა შეხვედრის ბოლოს ორივე ლიდერს აშკარად კმაყოფილი გამომეტყველება ჰქონდა - წერს "ბიბისი".

ორი ქვეყნის პრეზიდენტს შორის პირველი სრულფასოვანი შეხვედრა ტრამპის გაპრეზიდენტებიდან წელიწადნახევრისა და პუტინის პრეზიდენტის პოსტზე მეოთხე ვადით დანიშვნიდან რამდენიმე თვეში გაიმართა.

შეხვედრის ადგილად ქვეყნების პირველმა პირებმა ფინეთის დედაქალაქი აირჩიეს, ქალაქი, რომელსაც ორივე მხარის დიპლომატები ნეიტრალურ ტერიტორიას უწოდებდნენ. შეხვედრის დროდ კი ფეხბურთის მსოფლიო ჩემპიონატის დასრულების შემდეგი პერიოდი შეირჩა. თუმცა სამიტამდე სულ რაღაც 2 დღით ადრე ცხადი გახდა, რომ შეხვედრაზე ბოლომდე მეგობრული ატმოსფერო არ იქნებოდა: აშშ-ის პროკურატურამ პარასკევს რუსეთის ცენტრალური სადაზვერვო სამსახურის 12 თანამშრომელი აშშ-ის საპრეზიდენტო არჩევნებში ჩარევაში დაადანაშაულა.

მეგობრული ატმოსფერო არც ჰელსინკის ქუჩებში სუფევდა, უკვე კვირას ქალაქის ცენტრალური მოედნები ტრამპის პოლიტიკითა და პუტინის ქმედებებით უკმაყოფილო საპროტესტო აქციის მონაწილე ადამიანებით გაივსო.

აქციის მონაწილეები და ორგანიზატორები საერთაშორისო საზოგადოებისა და ჰელსინკში ჩასული ლიდერების ყურადღების მიპყრობას ისეთი საკითხებისადმი ცდილობდნენ, როგორიცაა ადამიანის უფლებები, დემოკრატია, მშვიდობა და კლიმატის ცვლილება. ადგილობრივი სამართალდამცველების განმარტებით, აქციას 2500-ზე მეტი ადამიანი შეუერთდა.

"ამ შეხვედრისგან არაფერს კარგს არ ველი, რადგან მთელს დედამიწაზე ორი ყველაზე ცუდი ადამიანი ხვდება ერთმანეთს. არ ვფიქრობ, რომ რამე შეიძლება უკეთესობისკენ შეიცვალოს. იმედი მაქვს დაინახავენ, რომ ჩვენ მათ გვერდით და მათ მხარეს არ ვართ" - განმარტა აქციაში მონაწილეობის მიზეზი ჰელსინკის ერთ-ერთმა მცხოვრებმა, ლინდა ვორენდვირდამ.

"მივიჩნევ, რომ ტრამპისთვის სამარცხვინო უნდა იყოს, გაიაროს ამხელა გზა მხოლოდ იმისთვის, რომ პუტინს მადლობა გადაუხადოს, რომელმაც მის გაპრეზიდენტებას ხელი შეუწყო. ფინეთს კი უნდა რცხვენოდეს, მსგავსი ლიდერების მასპინძლობა"- განმარტა თავისი პოზიცია აქციაში მონაწილე სირიელმა.

ტრამპმა და პუტინმა სხვადასხვა ფორმატის შეხვედრაზე საბოლოო ჯამში 4 საათი გაატარეს, ამის შემდეგ კი გადადგმული ნაბიჯების შესახებ სასაუბროდ მედიის წარმომადგენლებთან გამოვიდნენ.

"ჩვენი ურთიერთობა ძალიან ცუდ ვითარებაში იყო, მაგრამ ოთხი საათის წინ ეს შეიცვალა"- განაცხადა ტრამპმა.

ლიდერების განმარტებით, შეხვედრაზე მათ ყველა მწვავე თემა განიხილეს - დაწყებული ჩრდილოეთ კორეის ბირთვული პროგრამიდან, აშშ-ის საპრეზიდემტო არჩევნებში რუსეთის სავარაუდო ჩარევიდან და ბირთვული უსაფრთხოებიდან დაწყებული სპეცსამსახურების თანამშრომლობის შესაძლებლობით დამთავრებული. პრეზიდენტებმა განაცხადეს, რომ კონკრეტულ დეტალებს მოგვიანებით გაასაჯაროებდნენ.

რაღაც მომენტში ლიდერები ისე გაერთნენ, რომ პასუხების გაცემა ერთმანეთის ნაცვლად დაიწყეს. მაგალითად, ყირიმის შესახებ ტრამპის მისამართით დასმულ კითხვაზე პასუხი პუტინმა გასცა და ჟურნალისტს შემდეგი ფორმულირება შესთავაზა: "აშშ ნახევარკუნძულს უკანონოდ მიერთებულს უწოდებს და მას რუსეთის ნაწილად არ აღიარებს, რუსეთი კი თავის მხრივ რეფერენდუმს ლეგიტიმურად, ნახევარკუნძულს კი თავის ტერიტორიად მიიჩნევს", - ნათქვამია "ბიბისის" სტატიაში.

პრესკონფერენციაზე აშშ-ის პროკურატურის მიერ რუსეთის ცენტრალური სადაზვერვო სამსახურის 12 თანამშრომლის დადანაშაულების საკითხიც დაისვა, რა დროსაც პუტინმა აღიარა, რომ ტრამპის გაპრეზიდენტება სურდა, რადგან ის კრემლთან ურთიერთობის დარეგულირების მომხრე იყო. ტრამპმა კი განაცხადა, რომ არჩევნებში რუსეთის სავარაუდო ჩარევის კვალს ვერ ხედავს.

თეთრი სახლის ლიდერის მისამართით დასმულ კითხვაზე, ვისი სჯერა აშშ-ს პრეზიდენტს არჩევნებში რუსეთის სავარაუდო ჩარევის საკითხში, ტრამპმა უპასუხა: "მე ვენდობი ჩვენს დაზვერვას, მაგრამ მინდა ვთქვა, რომ პრეზიდენტი პუტინი დღეს ძალიან უარყოფდა ბრალდებას სავარაუდო ჩარევის შესახებ".

თეთრი სახლის ლიდერმა აღიარა, რომ მისი განცხადებები შესაძლოა უარყოფითად აღქმულიყო ამერიკის შეერთებულ შტატებში, თუმცა აქვე აღნიშნა, რომ მშვიდობის დასამყარებლად პოლიტიკურ რისკზე წასასვლელადაც მზად იყო. აშშ-ში ყველაზე მწვავედ ტრამპის სწორედ ზემოთთქმული განცხადება აღიქვეს და კრიტიკის ქარცეცხლში გაატარეს.

"როდესაც ტრამპს ჰქონდა შესაძლებლობა, დაეცვა თავისი სადაზვერვო სამსახურები, რომლებიც მასზე მუშაობენ, ძალიან დამამწუხრა და გამაოცა იმ ფაქტმა, რომ მან ერთ დაფაზე მოათავსა აშშ-ის სადაზვერვო სამსახურები და ის, რასაც პუტინი ამბობდა"- განმარტა თავისი პოზიცია რესპუბლიკელების სენატორმა, ბობ კორკერმა.

მსგავსი მოსაზრება გამოთქვა სამხრეთ კაროლინის რესპუბლიკელმა სენატორმა, ლინდსი გრემმა: "ტრამპმა გაუშვა თავისი შანსი, რუსეთისთვის 2016 წლის არჩევნებში ჩარევისთვის პასუხი მოეთხოვა და მკაცრად გაეფრთხილებინა ის".

გრემმა ასევე აღნიშნა, რომ ტრამპის ადგილას ის პუტინის მიერ ნაჩუქარ ბურთს მოსასმენი მოწყობილობების არსებობაზე შეამოწმებდა და მას თეთრ სახლში არასდროს მიიტანდა. აშშ-ის წარმომადგენელთა პალატის სპიკერის პოლ რაიანის თქმით, პრეზიდენტს უნდა ესმოდეს, რომ მოსკოვი ვაშინგტონის მოკავშირე არ არის და რომ არ არსებობს აშშ-სა და რუსეთს შორის არანაირი მორალური თანასწორობა.

თავის მხრივ სენატში დემოკრატების ლიდერმა ჩაკ შუმერმა ქვეყნის პრეზიდენტი დაადანაშაულა, რომ ის პუტინის მხარეს დადგა და ამერიკის სამართალდამცველების წინააღმდეგ გამოვიდა.

"ჩვენი ქვეყნის მთელს ისტორიაში ამერიკელებს ჯერ არასდროს უნაავთ, რომ აშშ-ის პრეზიდენტი მოწინააღმდეგეს ასე უჭერდა მხარს, როგორც ამას დონალდ ტრამპი აკეთებდა"- დაწერა ჩაკ შუმერმა ტვიტერის საკუთარ გვერდზე.

"ტრამპის მიზანი დაძაბულობის შერბილება იყო"- განაცხადა "ბიბისისთან" საუბარში აშშ-ის სახელმწიფო დეპარტამენტის ოფიციალურმა წარმომადგენელმა, ვანესა ეკერმა. - ჩვენ ორმხრივ ურთიერთობაში ბევრი პრობლემა გვაქვს - არა მხოლოდ არჩევნებში რუსეთის სავარაუდო ჩარევა, არამედ სირიაში არსებული ვითარება, კონფლიქტი უკრაინაში. და ის რომ მათ შეხვედრის შემდეგ პოზიტიური დამოკიდებულება ჰქონდათ, ძალიან კარგია", - განმარტა ეკერმა.