ჯონ ჰოპკინსის უნივერსიტეტის მკვლევარებმა აღმოაჩინეს, რომ ტროლების ონლაინ-აქტივობები მსოფლიოში პანდემიების რისკს ზრდის, ვაქცინაციის წინააღმდეგ ინტერნეტში გამოიყენებენ "ბოტებს", რომლებიც არასწორ ინფორმაციას ავრცელებს.

საზოგადოებრივი ჯანმრთელობის ამერიკულ ჟურნალში გამოქვეყნებულ კვლევაში წერია, რომ "სოციალური მედია ხშირად დადანაშაულებულია ჯანმრთელობისათვის დამაზიანებელი ინფორმაციის გავრცელებაში", კერძოდ, ვაქცინაციის საწინააღმდეგო ინფორმაციის გავრცელებაში. მკვლევარების თქმით, "ტვიტერის ბოტები" და "რუსული ტროლები" ავრცელებენ დეზინფორმაციას.

"ვაქცინაციის მოწინააღმდეგეები სოციალურ მედიაში მნიშვნელოვნად არიან წარმოდგენილები, ტვიტების 50% აცრებს ეწინააღმდეგება", - წერია კვლევაში, რომლის ფარგლებშიც 900 "ტვიტი" გაანალიზეს და დაადგინეს იყო თუ არა ისინი ბოტი ან ტროლი.

კვლევის ავტორების თქმით, მაშინ როდესაც ბოტების საშუალებით შესაძლოა გავრცელდეს არასწორი ინფორმაცია ჯანმრთელობის საკითხებთან დაკავშირებით, ტროლები, რომლებსაც რუსეთში ადამიანები ქმნიან, "ხელს უწყობს უთანხმოების" გამოწვევას.

"რუსული ტროლები და "ტვიტერის" ბოტები ვაქცინის შესახებ ინფორმაციას იმაზე ხშირად პოსტავს, ვიდრე საშუალო მომხმარებელი, ამასთან, აღსანიშნავია, რომ ისინი ერთნაირად აკეთებენ აქცენტს როგორც ვაქცინაციის მხარდამჭერ, ასევე მის საწინააღმდეგო დისკუსიებზე და ცდილობენ კამათის გამოწვევას და მის დიდხანს გაგრძელებას", - წერენ მკვლევარები.

წყარო: Deutsche Welle