"ლაიონ ეარის" თვითმფრინავმა, რომლის ბორტზეც 189 მგზავრი იმყოფებოდა და მოკლე რეისს ასრულებდა, ავიაკატასტროფა განიცადა, ინფორმაციას CNN ავრცელებს. თვითმფრინავი ჯაკარტადან ქალაქ პანგკალ–პინანგში მიფრინავდა.

ბოინგ 737-ის მგზავრებს შორის ერთი ბავშვი და ორი მოზარდი იყო, ბორტზე იმყოფებოდა ეკიპაჟის 6 წევრი და ორი მფრინავი.

თვითმფრინავი ზღვაში ჩავარდა, სამძებრო-სამაშველო ოპერაციებში ვერტმფრენი და 130 მაშველია ჩართული. ჩამოვარდნილი თვითმფრინავის ნაწილებს უკვე მიაგნეს, ასევე, ნაპოვნია მობილური ტელეფონი და სამაშველო ჟილეტები.

ბოინგ 737 ჯაკარტას საერთაშორისო აეროპორტიდან ადგილობრივი დროით 6:21 საათზე გაფრინდა და კუნძულ ბანგკაზე მდებარე ქალაქ პანგკალ პინანში 7:30 საათზე უნდა დაშვებულიყო. თვითმფრინავი რადარებმა ბოლოს 6:22 წუთზე დააფიქსირა.

ავიაკომპანიის ინფორმაციით, თვითმფრინავი "ლაიონ ეარმა" 2018 წლის აგვისტოში შეიძინა.

ინციდენტის მიზეზის დადგენის მიზნით გამოძიება დაწყებულია.