ხანძრის ახალი კერა ლოს-ანჯელესში: გაცემულია ბრძანება 50 ათასი ადამიანის ევაკუაციაზე - რა ვითარებაა ადგილზე
აშშ-ის კალიფორნიის შტატში ლოს-ანჯელესის ჩრდილოეთით დაახლოებით 80 კმ-ში ხანძრის ახალი კერა გაჩნდა, - ინფორმაციას Reuters-ი ავრცელებს.
გამოცემის ცნობით, ხანძარი 9 400 აკრ ტერიტორიაზე სწრაფად გავრცელდა, რასაც ძლიერმა ქარმაც შეუწყო ხელი. შექმნილი მდგომარეობის გამო, სავალდებულო ევაკუაციის ბრძანება 50 000-ზე მეტი ადამიანისთვის გაიცა, 23 000-მა კი ევაკუაციის გაფრთხილება მიიღო.
რაც შეეხება ხანძრის ორ კერას, რომელიც ლოს-ანჯელესში 7 იანვარს გაჩნდა, მეხანძრეებმა მათი კიდევ უფრო დიდი ნაწილის გაკონტროლება შეძლეს. ამ დროისთვის ლოკალიზებულია იტონის ხანძრის 91%-ი და პალისეიდსის ხანძრის 68%.
ცნობისთვის, აღნიშნულ ხანძრებს 28 ადამიანი ემსხვერპლა, დაზიანდა ან განადგურდა თითქმის 16 000 შენობა-ნაგებობა.