ალექსი პეტრიაშვილზე განხორციელებული თავდასხმისთვის დაკავებულ ლევან მექვაბიშვილს ბრალი ოფიციალურად წაუყენეს. მისი დაკითხვა და ბრალის წაყენება ე.წ. მოდულის შენობაში მოხდა.

რაც შეეხება აღკვეთის ღონისძიების შეფარდებას, აღნიშნულთან დაკავშირებით სასამართლო სავარაუდოდ, ხვალ იმსჯელებს.

"რუსთავი 2"- ის ინფორმაციით, ბორჯომში, მცხეთის ქუჩა 23 ნომერში მდებარე სახლი, სადაც ლევან მექვაბიშვილი დააკავეს, დალუქულია. სახლი მექვაბიშვილმა ცოტა ხნის წინ დაიქირავა.

როგორც დაკავებულის ადვოკატმა მარინა ფილაურმა განაცხადა, ლევან მექვაბიშვილს ალექსი პეტრიაშვილთან მოკლეხნიანი შეხება ჰქონდა და მათ შორის იყო "პატარა უთანხმოება".

"შეიძლება ორ ადამიანს შორის ქუჩაში მოხდეს ასეთი შელაპარაკება. მეტს ვერაფერს გეტყვით. არ არის არც პოლიტიკური და არც რამე სხვა მიზეზი. ეს არის ჩვეულებრივი, ყოფით ნიადაგზე მომხდარი კონფლიქტი. როგორც ვიცი, მანამდე რაღაც პატარა ყოფილა. ნუ გამაკეთებინებთ არასწორ კომენტარს, არასწორ ინფორმაციას ნუ მომაწოდებინებთ, სანამ კარგად არ გავივლით ყველაფერს. პეტრიაშვილს არ იცნობდა, შეხება ჰქონდათ გარკვეულ ეტაპზე მოკლე ხნით. იყო პატარა უთანხმოება", - განაცხადა მარინა ფილაურმა.

შინაგან საქმეთა სამინისტრომ "თავისუფალი დემოკრატების" ერთ-ერთ ლიდერ ალექსი პეტრიაშვილზე მომხდარი თავდასხმის საქმე გახსნა. როგორც უწყებაში განაცხადეს, სამართალდამცველებმა აღნიშნულ ფაქტზე 1975 წელს დაბადებული ლევან მექვაბიშვილი დააკავეს. მისი აყვანა ბორჯომში მოხდა.

"თავისუფალი დემოკრატების" ერთ-ერთი ლიდერი ალექსი პეტრიაშვილი 26 თებერვალს დაჭრეს.