ფემიციდის დანაშაულთან დაკავშირებით "რესპუბლიკელი" დეპუტატების ინიციატივა პარლამენტმა არ გაიზიარა.

"სისხლის სამართლის კოდექსში" თამარ კორძაიასა და თამარ ხიდაშელის მიერ მომზადებულ ცვლილებებს მხარი მხოლოდ 48 დეპუტატმა დაუჭირა, პროექტის წინააღმდეგ ხმა პარლამენტის ერთმა წევრმა მისცა და შედეგად ინიციატივა ჩავარდა.

პროექტის მიხედვით, "სისხლის სამართლის კოდექსს" ფემიციდთან დაკავშირებით სპეციალური მუხლი ემატებოდა, რომლის მიხედვით, გენდერული ნიშნით მოტივირებული ქალის განზრახ მკვლელობა განსაკუთრებით მძიმე კატეგორიის დანაშაული ხდებოდა.

გარდა ამისა, ცვლილებები ითვალისწინებდა გენდერული ნიშნით ჩადენილი დანაშაულების დამამძიმებელ გარემოებად აღიარებას ისეთ დანაშაულებთან მიმართებაში, როგორიცაა ჯანმრთელობის განზრახ მძიმე და მსუბუქი დაზიანება, ცემა, ძალადობა, იძულება და მუქარა.

ამასთან, პარლამენტმა დღეს პირველი მოსმენით მხარი დაუჭირა თამარ კორძაიასა და თამარ ხიდაშელის კიდევ ერთ საკანონმდებლო შეთავაზებას, რომლთაც დგინდება ადმინისტრაციული სანქცია სექსუალური შევიწროებისათვის, მათ შორის მაშინ, როცა ასეთ ქმედებას შრომითი ურთიერთობებისას აქვს ადგილი.