ბოლოს გამოქვეყნებულ კვლევებში ტენდენციები იყო სწორი, რომ მოსახლეობას არ სურს გააგრძელოს ცხოვრება "ქართული ოცნების" ხელისუფლების პირობებში და არ სურს დაბრუნდეს "ნაციონალური მოძრაობის" ძალადობრივი რეჟიმის პირობებში, - ამის შესახებ დღეს გამართულ პრესკონფერენციაზე "თავისუფალი დემოკრატების" ლიდერმა ირაკლი ალასანიამ განაცხადა.

მისი თქმით, "თავისუფალ დემოკრატებს" ყველაზე დიდი შანსი აქვთ, რომ იმ მოსახლეობის მხარდაჭერა მოიპოვონ, რომელსაც გადაწყვეტილება ჯერ არ მიუღია.

"ამ კვლევებში ტენდენციები იყო სწორი, რომ მოსახლეობის უმრავლესობას არ სურს გააგრძელოს ცხოვრება ისე, როგორც არის "ქართული ოცნების" ხელისუფლების პირობებში, რადგან არის სტაგნაცია, ერთ ადგილს ვტკეპნით და არ უნდათ დაბრუნება "ნაციონალური მოძრაობისდროინდელ" სასტიკი ძალადობის რეჟიმში. ამიტომ, "თავისუფალ დემოკრატებს" გვაქვს ყველაზე მაღალი შანსი გადაუწყვეტელი ამომრჩეველი გადმოვხაროთ ჩვენს მხარეს, თუმცა ამას სჭირდება დიდი მუშაობა", - განაცხადა ალასანიამ.

გავრცელებულ ინფორმაციაზე, რომ "რუსთავი2"-ის მიერ გამოქვეყნებული GFK-ის კვლევის საველე სამუშაოები ჩაატარა "ნაციონალური მოძრაობის" წევრის, ლევან თარხნიშვილის მეუღლის ორგანიზაციამ, ალასანიას განაცხადა, რომ "ამ პიროვნების მიერ ჩატარებული კვლევები დიდ სანდოობას არ იწვევს".

"მე თავიდანვე ვთქვი, რომ მთავარი განმსაზღვრელი არის საზოგადოების მხარდაჭერა არჩევნებზე- აზრი, რომელიც დაფიქსირდება მათი მხრიდან საარჩევნო ყუთთან. 2010 წელს, 4 თვით ადრე არჩევნებამდე, მე პირადად 7% დამიწერეს გამოქვეყნებულ კვლევებში, თუმცა არჩევნებში ავიღე 3-ჯერ მეტი ხმა. კვლევები არ უნდა ტარდებოდეს იმისთვის, რომ მოლოდინი გავაჩინოთ, თუ რა შედეგი დადგება არჩევნებზე. ყველა აკეთებს კვლევას. გამოქვეყნდა ივანიშვილი-ბიგვავას კვლევაც, რომელიც ასევე დიდ კითხვებს აჩენს", - განაცხადა "თავისუფალი დემოკრატების" ლიდერმა.