"ქართული ოცნების" თბილისის მაჟორიტარი დეპუტატობის კანდიდატების შესახებ პირველი შეფასებები გაკეთდა | Allnews.Ge

პარტია "ქართულმა ოცნებამ" თბილისის მაჟორიტარი დეპუტატობის კანდიდატები წარადგინა. კანდიდატები მთაწმინდის პარკში გამართულ ღონისძიებაზე თავად პრემიერ-მინისტრმა გიორგი კვირიკაშვილმა დაასახელა.

"ქართული ოცნების" კეთილი სურვილები, როგორც ჩანს, სრული ფიასკოთი დასრულდა, - ამის შესახებ პოლიტოლოგმა გია ხუხაშვილმა "ქართული ოცნების" თბილისის მაჟორიტარი დეპუტატობის კანდიდატების შეფასებისას განაცხადა.

"ქართულ ოცნებას" მუდმივად აქვს კეთილი სურვილები, რასაც არასოდეს არ უწერია განხორციელება. ფეხბურთელმა ფეხბურთელები მოიყვანა, მსახიობმა - მსახიობები, ინტელექტუალობაზე პრეტენზიის მქონემ - ინტელექტუალი მოიყვანა და ასე ეკლექტურად შედგა ის, რაც შედგა. ყველაზე სამწუხარო გახლავთ ის, რომ ბუნებრივია ამ ადამიანებს და "ქართული ოცნების" დანარჩენ ელიტას, საკუთარი თავის იმედი არ აქვს და ისევ და ისევ აქვთ ბიძინა ივანიშვილის რესურსების გამოყენებით იმის იმედი, რომ ბიძინა ჩაატარებს ფოკუსებს და ამ ადამიანებს, მიუხედავად ყველაფერისა, მიუხედავად ამ ეკლექტიკისა, გამოუცდელობისა, აიყვანს თავის მხრებზე და შეიყვანს პარლამენტში ანუ ისევ ჩვენ ვადგებით ბიძინა ივანიშვილის რესურსებზე პარაზიტირების კლასიკურ ნიმუშს, მათ შორის სამწუხაროდ თბილისში", - განაცხადა გია ხუხაშვილმა.

პოლიტოლოგის აზრით, დღეს "ქართული ოცნება" გადამწიფებული ასაკის თინეიჯერია, ყოფილი პრემიერ-მინისტრი ბიძინა ივანიშვილი კი როგორც კლასიკური ქართველი მამა ისე იქცევა.

"ქართული ოცნება" ჩამოყალიბდა კლასიკურ ქართულ ოჯახად ანუ ის არის გადამწიფებული თინეიჯერი, რომელსაც ბირჟაზე დგომისა და "სემიჩკის" ფურთხების მეტი არაფერი უკეთებია, მამიკომ მოაწყო სამსახურში, იქიდან აგდებენ, იმიტომ რომ არაფერს არ აკეთებს, მამიკო ურეკავს დირექტორს და თხოვს - გასაგებია რომ ასეა, მაგრამ ჩემი შვილია და იქნებ დატოვო სამსახურში.

"ოცნების" რიგებს ლევან კობიაშვილი, მიხეილ ყაველაშვილი, მუსიკოსი ზაზა ხუციშვილი და გათავისუფლებული ლევან გოგიჩაიშვილი შეუერთდნენ

დაახლოებით ამ ვითარებასთან გვაქვს სამწუხაროდ საქმე. "ქართული ოცნება" დღეს არის გადამწიფებული, ასაკოვანი თინეიჯერი და ისევე უნდა ცხოვრების გაგრძელება, როგორც დაიწყო. ბიძინა ივანიშვილი კი ამ შემთხვევაში იქცევა როგორც კლასიკური ქართველი მამა, რომელსაც ესმის, რომ მისი შვილი არაფრის მაქნისია, მაგრამ მისი შვილია და რა ქნას?! ხომ არ გადააგდებს? ასე რომ, უნდა დაურეკოს დირექტორს და თხოვოს, რომ მისი შვილი სამსახურში დატოვოს", - განაცხადა ხუხაშვილმა.

როგორც ჩანს, კრიტიკამ არ იმუშავა და "ოცნება" მხედველობაში იღებს, თუ რამდენად პოპულარული და ცნობილია ადამიანი, - ასე შეაფასა დედაქალაქში, "ქართული ოცნების" მაჟორიტარი დეპუტატების კანდიდატების სია "რესპუბლიკური პარტიის" ერთ-ერთმა ლიდერმა ლევან ბერძენიშვილმა.

მისი თქმით, როგორც ჩანს, საქართველოში ცნობადი პოლიტიკოსები ამოიწურა და "ქართული ოცნება" გადავიდა ცნობილ მომღერლებზე, მორაგბეებსა და ფეხბურთელებზე.

"მოჭიდავეც არ დააკლდება პარლამენტს - რაც რიოში დაგვაკლეს, პარლამენტში მაინც გვეყოლებიან.

"ქართული ოცნების" სია ძალიან შემაშფოთებელია. ეს ნიშნავს, რომ პოლიტიკური ძალით არ აპირებენ პარლამენტში მუშაობას. ერთი-ორი პოლიტიკოსის გარდა სულ ახალბედები და არაკვალიფიციური ხალხია, შესაბამისად, პარლამენტში მუშაობა ყველამ უნდა ისწავლოს. მე არ ვამბობ, რომ ვერ ისწავლიან, მაგრამ ასე არ ხდება ხოლმე, რომ ამდენი მოყვარული შემოვიდეს პარლამენტში, რომლებსაც საერთოდ შეხება არ ჰქონიათ პოლიტიკასთან, თუ არ ვიტყვით იმას, რომ ბატონ ხუციშვილს თავის სიმღერაში სიტყვა "ოცნება" აქვს ნახსენები. დანარჩენი მისი პოლიტიკური წარსულის შესახებ არ მსმენია.

"ქარული ოცნების" მაჟორიტარი დეპუტატობის კანდიდატი გიორგი მოსიძე საკუთარ პრიორიტეტებზე საუბრობს

ასევე არ ვიცი ბიძინა გეგიძე როგორი პოლიტიკოსი იქნება. ეს არ არის აკრძალული და დასაშვებია, მაგრამ ამ რაოდენობის მიხედვით, "ქართული ოცნება" ფაქტობრივად არაპოლიტიკური პარლამენტის შექმნას აპირებს იმ შემთხვევაში, თუ წარმატებას მიაღწევს. მისი ავტორიტეტი, როგორც ჩანს, ძალიან უნდა დაეცეს და უმნიშვნელო უნდა გახდეს, რადგან ეს ხალხი ყველა თუ შევა პარლამენტში, პარლამენტის კლასი არსებულთან შედარებითაც კი დაბლა დაიწევს. ამიტომ, იმედი ვიქონიოთ, რომ სხვებიც შეავსებენ პარლამენტს", - განაცხადა ბერძენიშვილმა.

მისივე თქმით, მომღერლებისა და სპორტსმენების პარლამენტში შეყვანა, არასწორი გადაწყვეტილებაა.

"იმ ბრწყინვალე ფეხბურთელებზე ცუდი სიტყვა როგორ დამცდება, ან გეგიძეზე, უზარმაზარი მნიშვნელობის სპორტსმენები არიან, მაგრამ რა შუაშია პოლიტიკასთან? ადრე ნაკლები იყვნენ მომღერლები? - ახლა რაღაც მეტი დააპირეს. ვინც მოიფიქრა ეს, არის არსებითად არასწორი გადაწყვეტილება.

რაც შეეხება იმას, თუ რამდენად კონკურენტუნარიანები იქნებიან ისინი ამ ტიპის არჩევნებში, რატომღაც დარწმუნებულები არიან, რომ არაპოლიტიკოსები პოლიტიკოსებს ყველგან მოუგებენ. სასარგებლო იქნება თუ ნაკლებად მოხვდებიან პარლამენტში", - განაცხადა ბერძენიშვილმა.

სოსო ცისკარიშვილის თქმით, თბილისელების გემოვნებას წარდგენილი კანდიდატების ნაწილი მეტ-ნაკლებად მოერგება.

"ალბათ თბილისელებისთვის საინტერესო იქნება, ვინ შეარჩია ეს ადამიანები თბილისელების გასაშაყირებლად. ფაქტია, რომ სპორტსმენებს რაღაც ჯადო აქვთ, რომლის გარეშეც ქართული პარლამენტარიზმი ჩამოიშლებოდა. როცა ვხედავთ, რომ ფეხბურთელები, მიუხედავად მათი მაღალი თანამდებობისა პარლამენტისკენ იწევენ, ძალაუნებურად ჩნდება აზრი, ეს არის წინაპირობა იმისა, რომ ბატონმა კალაძემ ვიცე-პრემიერობაც დაუთმოს საკუთარ ფავორიტებს.

ამ შემთხვევაში ყველაფერი გასაგები იქნებოდა. რატომ ის სპორტსმენები, რომლებიც დასახელებულია და არა სხვა, ამაზე პასუხი არ არის. ანუ არ ჩანს საფუძველი. წარმატებული ბიზნესმენები ჩემთვის მისაღებია, მაშინ როდესაც თბილისელობა მათ შუბლზე აწერიათ საკუთარი ცხოვრების წესით. ქალბატონი სალომე ზურაბიშვილი გახლავთ უპირველეს ყოვლისა ის პერსონა, რომელსაც ნებისმიერი პოლიტიკური ძალა ინატრებდა", - განაცხადა ცისკარიშვილმა.

როგორც პოლიტოლოგი აღნიშნავს, მხოლოდ ფეხბურთელობა და მორაგბეობა არ არის დამაჯერებელი ამომრჩევლისთვის, რათა მოსახლეობამ საკუთარი არჩევანი მათზე შეაჩეროს.

"როდესაც საუბარია პიროვნების რაიმე დამსახურებაზე, მხოლოდ ფეხბურთელობა და მორაგბეობა არ შეიძლება ამომრჩევლისთვის დამაჯერებელი იყოს, თანაც ყოფილ სპორტსმენებზეა საუბარი ამ შემთხვევაში. თუ წლების განმავლობაში სპორტსმენმა რაიმე სახელმწიფოებრივი აზროვნებით არ მოახდინა ეფექტი ჩვენს ცნობიერებაზე, შეიძლება დაიბადოს აზრი, რომ ვიღაცას მოუნდა თბილისელების გაშაყირება. ჩემი აზრით, იმატებს იმის შესაძლებლობა, რომ თბილისის მაჟორიტარები არ იყვნენ წარმოდგენილები მხოლოდ "მეოცნებეთა" და "ნაციონალების" კანდიდატებით", - განაცხადა ცისკარიშვილმა.

არტია "ქართული ოცნება - დემოკრატიული საქართველოს" მაჟორიტარობის კანდიდატები არიან:

1. გლდანში, მე-20 ოლქში, კობა კობალაძე.

2. გლდანში, 21-ე ოლქში, - ლევან კობიაშვილი.

3. გლდანში, 22-ე ოლქში - ლევან კობერიძე.

4. დიდუბეში, მე-15 ოლქში - ზაზა პაპუაშვილი.

5. დიდუბეში, მე-16 ოლქში - ილია წულაია.

6. ვაკეში, მე-2 ოლქში - ბიძინა გეგიძე.

7. ვაკეში, მე-3 ოლქში - ზაზა ხუციშვილი.

8. ისანში, მე-8 ოლქში - ირაკლი აბუსერიძე.

9. ისანში, მე-9 ოლქში - დავით ჭიჭინაძე.

10. ისანში, მე-10 ოლქში - ბექა ნაცვლიშვილი.

11. კრწანისში, მე-7 ოლქში - ბექა ოდიშარია.

12. მთაწმინდაზე, 1-ელ ოლქში პარტია მხარს სალომე ზურაბიშვილს დაუჭერს.

13. ნაძალადევში, მე-17 ოლქში "ქართული ოცნებიდან" კენჭს სოფო კილაძე იყრის.

14. ნაძალადევში, მე-18 ოლქში - მიხეილ ყაველაშვილი.

15. ნაძალადევში, მე-19 ოლქში - ზაზა გაბუნია.

16. საბურთალოზე, მე-4 ოლქში - მამუკა მდინარაძე.

17. საბურთალოზე, მე-5 ოლქში - ნინო გოგუაძე.

18. საბურთალოზე, მე-6 ოლქში - ლევან გოგიჩაიშვილი.

19. სამგორში, მე-11 ოლქში - გიორგი მოსიძე.

20. სამგორში, მე-12 ოლქში - მარიამ ჯაში.

21. სამგორში, მე-13 ოლქში - შოთა ხაბარელი.

22. ჩუღურეთში, მე-14 ოლქში კი გია ვოლსკი.