მამუკა არეშიძე "პატრიოტთა ალიანსთან" შეერთების მიზეზებზე საუბრობს | Allnews.Ge

"საქართველოს პატრიოტთა ალიანსის" თეთრიწყაროს მაჟორიტარი დეპუტატობის კანდიდატი კავკასიის საკითხებში ექსპერტი მამუკა არეშიძე იქნება. მისი განცხადებით, "ქართულ ოცნებასთან" არშემდგარი თანამშრომლობის შემდეგ, რამდენიმე პარტიისგან მიიღო შემოთავაზება, თუმცა, საბოლოოდ, არჩევანი "პატრიოტთა ალიანსზე" შეაჩერა.

"პატრიოტთა ალიანსის" საარჩევნო სიაში გამოჩენას, არეშიძე გარდაბნის რაიონის მაჟორიტარობის კანდიდატობაზე "ქართული ოცნებისგან" მიღებულ უარს ასახელებს.

ქართულმა ოცნებამ" ჩემთან თანამშრომლობა არ მოინდომა, თორემ მე მინდოდა, ქვემო ქართლში ამ პარტიის სახელით მეყარა კენჭი, რადგანაც მისი ერთ-ერთი დამფუძნებელი ვარ.

"ჩვენ ბოლო მომენტამდე გვქონდა შეხების წერტილები, მაგრამ საბოლოო ჯამში, ყველაფერი ასეთი დაშორებით დასრულდა. ამასობაში, რამდენიმე სხვა პარტიისგან მივიღე შემოთავაზება, თანაც თავად არცერთი მათგანისთვის არ მიმიმართავს და, საბოლოოდ, არჩევანი "პატრიოტთა ალიანსზე" შევაჩერე." - განაცხადა მამუკა არეშიძემ ALLNEWS.GE-სთან საუბარში.

მამუკა არეშიძის თქმით, "პატრიოტთა ალიანსზე" არჩევანი პატრიოტულ თემასთან დაკავშირებით გარკვეული იდეოლოგიური თანხევდრისა და ზოგიერთი საერთო ხედვის გამო შეაჩერა. ის ასევე აღნიშნავს, რომ მათ შორის საკამათო ხედვებიც იყო, თუმცა პრინციპულ საკითხებში "პატრიოტთა ალიანსს" ეთანხმება, - "ასევე იყო პიროვნული ფაქტორიც, რადგან მე და ირმა ინაშვილი დიდი ხნის განმავლობაში ტელევიზიაში ერთად ვმუშაობდით, მე მას ბავშვობიდან ვიცნობ და ვიცი მისი თვისებები, რის გამოც, ყოველთვის კეთილგანწყობილი ვიყავი, ეს ჩემი "პატრიოტთა ალიანსის" რიგებში გამოჩენის ერთ-ერთი მიზეზი იყო," - აღნიშნა მამუკა არეშიძემ.

ექსპერტი "ქართულ ოცნებასთან" მაჟორიტარი დეპუტატობის კანდიდატობასთან დაკავშირებით მოლაპარაკებებს 2016 წლის ზამთრიდან აწარმოებდა. თებერვალში, პარტიის აღმასრულებელ მდივანთან, ირაკლი კობახიძესთან შეხვედრის შემდეგ, მამუკა არეშიძემ განაცხადა, რომ მან გარდაბნის გამგებლის პოსტზე კენჭის ყრის შეთავაზება მიიღო, თუმცა იმ პირობით დათანხმდებოდა, თუ ამას ავტომატურად ოლქის მაჟორიტარობა დაემატებოდა, რაზეც, რამდენიმეთვიანი მოლაპარაკებების შემდეგ უარი განუცხადეს.

2016 წლის თებერვალში ირაკლი კობახიძესთან გამართული შეხვედრის შემდეგ, მამუკა არეშიძემ, ასევე განაცხადა, რომ გაზაფხულზე მისი მაჟორიტარობის საკითხს ბიძინა ივანიშვილი გადაწყვეტდა, თუმცა, ამჟამად, ვერ ადასტურებს, რომ უარი ყოფილი პრემიერისგან მიიღო. 

"არ ვიცი, ბიძინა ივანიშვილმა მიიღო თუ არა ეს გადაწყვეტილება, რადგან "ქართული ოცნების" წარმომადგენლების შეხვედრას მე პირადად არ დავსწრებივარ, თუმცა როდესაც მაჟორიტარობის კანდიდატობაზე უარყოფითი პასუხი მივიღე, გამგებლობაზე მე თვითონ ვთქვი უარი," - აღნიშნა ექსპერტმა.

"საქართველოს პატრიოტთა ალიანსში" აცხადებენ, რომ მამუკა არეშიძის მაჟორიტარი დეპუტატობის კანდიდატად დასახელების მთავარი მიზეზი იდეოლოგიური თანხვედრა იყო.

რაც შეეხება ექსპერტის პოლიტიკურ წარსულს, 4 წლის წინ, 2012 წლის არჩევნებზე, მამუკა არეშიძე "ქართული ოცნების" საარჩევნო სიაში იყო და კენჭს გარდაბნის რაიონში იყრიდა, თუმცა, მისი თქმით, არჩევნები გაყალბდა და სწორედ ამიტომ ვერ მოიპოვა გამარჯვება.

ამჟამად, მამუკა არეშიძეს 2016 წლის 8 ოქტომბრის არჩევნებში წარმატების იმედი აქვს.