რაიმე პატარა შანსიც არ არსებობს იმის, რომ ქვეყანაში რევოლუციური სცენარი განვითარდეს, - ამის შესახებ ჟურნალისტებს "ქართული ოცნება – დემოკრატიული საქართველოს" ერთ-ერთმა ლიდერმა თამარ ჩუგოშვილმა დღეს გამოქვეყნებული ჩანაწერების კომენტირებისას განუცხადა, რომელშიც "ნაციონალური მოძრაობის" წევრები ფიგურირებენ და გარკვეულ არეულობაზე საუბრობენ.

მისი თქმით, საქართველო ღირსეული, დემოკრატიული არჩევნების გზით გაივლის ამ პერიოდს.

"მე არ ვიცი, რამდენად ავთენტურია ეს ინფორმაცია. რთულია კომენტარის გაკეთება, როდესაც ინფორმაციის ავთენტურობა არ არის დადასტურებული. თუმცა პირველად არ ხდება, როცა ამ ტიპის შეთქმულებებზე მიდის საუბარი. ჩვენ მოგვისმენია გარკვეული საუბრები, რომლის ავთენტურობაც დადასტურდა, ამიტომ არც იმას გამოვრიცხავ, რომ ასეთი მოსაზრებები სადღაც მუსირებდეს, თუმცა ქვეყანაში არ არსებობს პატარა შანსიც რაიმე მსგავსი სცენარის განხორციელების. ვერანაირი რევოლუცია ქვეყანაში ვერ მოხდება. ჩვენ დემოკრატიული არჩევნების გზით გავივლით ამ პერიოდს", - განაცხადა თამარ ჩუგოშვილმა.