რაღაც უჩვეულო რომ ხდებოდა ერაყელი აბუ-ანისი მას შემდეგ მიხვდა, რაც აფეთქებების ხმა გაიგო. ხმა მდინარე ტიგროსის დასავლეთ სანაპიროზე განთავსებული ქალაქ მოსულის ძველი ნაწილიდან მოდიოდა.

"იქ მცხოვრებ ნაცნობებს დავურეკე და მათ მითხრეს, რომ შეიარაღებულმა ადამიანებმა დაიკავეს რაიონი. ტერიტორიის დაკავებისას კი განაცხადეს, რომ მოსახლეობის დასახმარებლად და ერაყის შეიარაღებული ძალებისგან გასათავისუფლებლად მივიდნენ" - იხსენებს აბუ ანისი.

მომდევნო დღეს თავდამსხმელები მდინარის მეორე მხარეს გადავიდნენ და მოსულის მეორე ნაწილიც დაიმორჩილეს. ერაყის შეიარაღებული ძალები და პოლიციის თანამშრომლები, რომლებიც რიცხობრივად ბევრად აღემატებოდნენ თავდამსხმელებს, გაიქცნენ.

"ოფიცერები ფორმას გზადაგზა იხდიდნენ და შეშინებული ადამიანების ჯგუფს აფარებდნენ თავს", - ყვება მოსულში მცხოვრები აბუ ანისი.

2014 წლის 10 ივნისს ერაყის სიდიდით მეორე ქალაქი მოსული, სადაც 2 მილიონამდე ადამიანი ცხოვრობდა, დამწიფებული ნაყოფივით ჩაუვარდა ხელში შეიარაღებული დაჯგუფების წევრებს.

ერაყის ჯარი, რომელსაც ამერიკელები 2003 წლიდან მოყოლებული გულმოდგინედ წვრთნიდნენ და უახლესი ტექნიკით ამარაგებდნენ, დაიშალა, გაიქცა და პირდაპირ ქუჩებში დატოვა ჯავშანტექნიკა და უახლესი შეიარაღება, რაც დაუყოვნებლივ აღმოჩნდა ისლამისტი მებრძოლების ხელში. გარდა ამისა, არსებობს ცნობები, რომ მათ 500 მილიონი აშშ დოლარი ჩაუვარდათ ხელში, რომელიც ერაყის ცენტრალური ბანკის მოსულის განყოფილებაში ინახებოდა.

"თავდაპირველად ყველაფერი კარგად იყო"-ამბობს აბუ ანისი,- მათ დაანგრიეს ის ღობეები, რომლებითაც ერაყის შეიარაღებულმა ძალებმა კვარტლები გამოყვეს, ხალხს ეს მოეწონა, გარდა ამისა, ისინი ძალიან სალმიანები და გულღიები ჩანდნენ, გვეუბნებოდნენ თუ რამე დაგჭირდებათ ჩვენ აუცილებლად დაგეხმარებითო", - იხსენებს აბუ ანისი.

თუმცა, როგორც აღმოჩნდა, მოსულის "თაფლობის თვე" რამდენიმე კვირას გაგრძელდა, რასაც პირსისხლიანი პერიოდი მოჰყვა. სულ რაღაც ორი თვის შემდეგ, დაჯგუფებამ, რომელიც საკუთარ თავს უკვე "ისლამურ სახელმწიფოს" უწოდებდა კვლავ დაპყრობითი ოპერაციები დაიწყო და ტერიტორიების გაფართოვებას მიჰყო ხელი, რომელსაც თან ადამიანების წამება, უმკაცრების წესით დასჯა და შარიათის წესების დანერგვა მოჰყვა.

ამ წესების დარღვევისთვის ადამიანებს სხვადასხვა, თუმცა, ყველა შემთხვევაში სისხლიანი სასჯელით სჯიდნენ. სულ რამდენიმე თვე დასჭირდათ დაეშის მებრძოლებს, რომ მსოფლიო პოლიტიკის ავანსცენაზე გამოსულიყვნენ. მათი არსებობის შესახებ მსოფლიოში თითქმის ყველა სახლში გაიგეს, მათი უგულებელყოფა ძნელი იყო, რადგან უკანასკნელი სამი წლის განმავლობაში თვითგამოცხადებულმა ხალიფატმა საკუთარ თავზე 29 ქვეყანაში 150 ტერაქტის განხორციელებაზე აიღო პასუხისმგებლობა, თავდასხმებს კი საერთო ჯამში 2 ათასზე მეტი ადამიანის სიცოცხლე ემსხვერპლა.

ქვემოთ მოცემულ რუკაზე სირია და ერაყია ასახული. შავად მონიშნულ ტერიტორიებს "ისლამური სახელმწიფო" ამდრომდე აკონტროლებს. მიიტანეთ კურსორი ქალაქის დასახელებაზე და წაიკითხეთ მეტი.

  პალმირა სირიის შეიარაღებულმა ძალებმა, რუსეთის დახმარებით, სირიის ისტორიული ქალაქი პალმირა ტერორისტული დაჯგუფება „ისლამური სახელმწიფოსგან“ 2016 წლის 27 მარტს გაათავისუფლეს. პალმირა და მისი მიმდებარე ქალაქი ტადმური ექსტრემისტების ხელში 2015 წლის მაისში აღმოჩნდა. იხილეთ მეტი   რაქა სირიის დემოკრატიულმა ძალებმა, აშშ-ის დახმარებით, „ისლამური სახელმწიფოს“ დეფაქტო დედაქალაქი 2017 წლის 17 ოქტომბერს გაათავისუფლეს. რაქა ისლამისტების კონტროლს 2014 წლის დასაწყისიდან ექვემდებარებოდა. იხილეთ მეტი   დეირ-ეზ-ზორი სირიის ჯარმა და მოკავშირეთა ძალებმა ქალაქ დეირ-ეზ-ზორზე სრული კონტროლი 3 ნოემბერს აღადგინეს. ისის-ი ქალაქის დიდ ნაწილს 2014 წლიდან აკონტროლებდა. იხილეთ მეტი   აბუ ქემალი სირიის სამთავრობო ძალებმა შიიტ ამბოხებულებთან ერთად, ერაყის საზღვრისპირა ქალაქი, აბუ-ქემალი "ისლამური სახელმწიფოს" ტერორისტებისგან 2017 წლის 9 ნოემბერს გაათავისუფლეს. იხილეთ მეტი   ალ ბაბი სირიის ქალაქი ალ-ბაბი „ისლამური სახელმწიფოს“ ტერორისტებისგან 2017 წლის 21 თებერვალს გათავისუფლდა.   ჰავიჯა ერაყის არმიამ „ისლამური სახელმწიფოსგან“ ქალაქი ჰავიჯა 2017 წლის 4 ოქტომბერს გაათავსიუფლა. ქალაქს ექსტრემისტები 2014 წ;ლიდან აკონტროლებდნენ.   ტალ აფარი ერაყის არმიამ „ისლამური სახელმწიფოსგან“ ქალაქი ტალ-აფარი 2017 წლის 26 აგვისტოს გაათავისუფლა. "ისლამურმა სახელმწიფომ" ქალაქი 2014 წელს დაიკავა.   მოსული ერაყის თავდაცვის სამინისტრომ მოსულის "ისლამური სახელმწიფოს" ტერორისტებისგან სრული გათავისუფლების შესახებ ინფორმაცია 2017 წლის 29 ივნისს გაავრცელა. მისი გათავისუფლების ოპერაცია 9 თვე მიმდინარეობდა. იხილეთ მეტი   ისლამური სახელმწიფო „ისლამური სახელმწიფო“ - „ისლამურმა სახელმწიფომ“ 2014 წლის დასაწყისში სირიის ქალაქი რაქა აიღო და ის ე.წ. ხალიფატის დე ფაქტო დედაქალაქად გამოაცხადა. 2014 წლის მონაცემებით დაეში 100 ათას ვკადრატულ კილომეტრს ფლობდა. 2017 წლის დასაწყისისთვის გავლენის სფერო განახევრდა და ექსტრემისტების კონტროლის ქვეშ 45,377 კვადრატული კილომეტრი დარჩა. დაპყრობითი ოპერაციების შედეგად ექსტრემისტების მიერ კონტროლირებად ტერიტორიაზე 10 მილიონზე მეტი ადამინი ცხოვრობდა. დღეს ისლამისტები ერაყსა და სირიაში მხოლოდ 10,210 კვადრატულ კილომეტრს აკონტროლებენ.   ისლამური სახელმწიფო „ისლამური სახელმწიფო“ - „ისლამურმა სახელმწიფომ“ 2014 წლის დასაწყისში სირიის ქალაქი რაქა აიღო და ის ე.წ. ხალიფატის დე ფაქტო დედაქალაქად გამოაცხადა. 2014 წლის მონაცემებით დაეში 100 ათას ვკადრატულ კილომეტრს ფლობდა. 2017 წლის დასაწყისისთვის გავლენის სფერო განახევრდა და ექსტრემისტების კონტროლის ქვეშ 45,377 კვადრატული კილომეტრი დარჩა. დაპყრობითი ოპერაციების შედეგად ექსტრემისტების მიერ კონტროლირებად ტერიტორიაზე 10 მილიონზე მეტი ადამინი ცხოვრობდა. დღეს ისლამისტები ერაყსა და სირიაში მხოლოდ 10,210 კვადრატულ კილომეტრს აკონტროლებენ.

ისლამისტებმა ევროპის შუაგულამდეც ჩააღწიეს და ტერაქტების სერია პარიზსა და ბრიუსელშიც მოაწყვეს, სინაის ნახევარკუნძულის თავზე რუსული ვერტმფრენის ჩამოგდება მოახერხეს და აშშ-ის ღამის კლუბში ერთ-ერთი ყველაზე სისხლიანი ჟლეტის სულისჩამდგმელები აღმოჩნდნენ. დაუჯერებლია მაგრამ მათ თითქმის მთელი მსოფლიოს და დასავლეთის წამყვანი ქვეყნის პროვოცირება გამოიწვიეს - პასუხმაც არ დააყოვნა.

კოალიციამ უფრო ფართომასშტაბიანი და ინტენსიური საჰაერო თავდასხმები წამოიწყო, პროცესში 2016 წელს რუსეთიც კი ჩაერთო, რომელიც კოალიციის წევრი დღემდე არ არის. კოალიცია ამერიკის შეერთებული შტატების მეთაურობით ტერორისტული დაჯგუფება "ისლამური სახელმწიფოს" იარაღის საცავებსა და ნავთობის გადამზიდ კონტეინერებს უმიზნებდა, ამით, ერთი მხრივ, მოწინააღმდეგის განიარაღებას და მათთვის ფინანსურ რესურსთან წვდომას უშლიდა ხელს. 2014 წლიდან დღემდე კოალიციამ ამერიკის შეერთებული შტატების მეთაურობით მხოლოდ ერაყში 13 043 ავიაიერიში განახორციელა, რომელთა სამიზნე ტერორისტული დაჯგუფება "ისლამური სახელმწიფოს" ბაზები იყო, ამავე პერიოდში სირიაში ექსტრემისტების პოზიციაზე 13 808-ჯერ მიიტანეს იერიში. აღსანიშნავია, რომ აღნიშნული რაოდენობა რუსეთის მიერ განხორციელებულ საჰაერო თავდასხმებს არ აერთიანებს.

ინტენსიურმა თავდასხმებმა ექსტრემისტების პოზიციების დასუსტება გამოიწვია. ერთ-ერთი პირველი ქალაქი, რომელიც ტერორისტების ბატონობისგან გათავისუფლდა სირიის ისტორიული ქალაქი პალმირა იყო. უკანასკნელი ქალაქი კი, რომელიც ხელისუფლების კონტროლს დაუბრინდა ერაყის საზღვრისპირა ქალაქი, აბუ-ქემალია. ექსტრემისტების გავლენის სფეროს გამოაკლდა სიარიაში ტერორისტების ერთ-ერთი მთავარი დასაყრდენი ქალაქი დეირ ეზ-ზორიც. თუმცა, ეს კოალიციისა და სირია-ერაყის სახელისუფლებო ძალების ერთადერთი წარმატება ნამდვილად არ არის.

კოალიციამ ამერიკის შეერთებული შტატების მეთაურობით, ექსტრემისტების სამწლიან მმართველობას ე.წ ხალიფატის დე ფაქტო დედაქალაქი რაქაც გამოგლიჯეს.

სირიის დემოკრატიულმა ძალებმა რაქას გამოსახსნელად სპეცოპერაცია მიმდინარე წლის ივნისში დაიწყეს, ანუ ერაყის სახელისუფლებო ძალების მიერ ერაყის ქალაქ მოსულის გათავისუფლებიდან ერთი თვის შემდეგ, რომლის დასაბრუნებლად ინტენსიური დაპირისპირება 9 თვის განმავლობაში მიმდინარეობდა.

ტერორისტული დაჯგუფების მებრძოლებს პოზიციების დათმობა და უკან დახევა მოუხდათ. იმის გამო, რომ მათი გავლენის სფეროები სირიასა და ერაყში შემცირდა, მებრძოლთა უმეტეს ნაწილს სამშობლოში დაბრუნება მოუხდა. დაბრუნებულთა ნაწილი უკვე საპატიმროშია, ნაწილმა კი მხედველობის არიდან გაქრობა მოახერხა. დაყარეს თუ არა იარაღი ჯიჰადისტებმა სირიასა და ერაყში თუ კვლავ განაგრძობენ ბრძოლას ისლამის სახელით მომავალი გვიჩვენებს. თუმცა ფაქტია, რომ კრაზანების ბუდის დაშლამ, შესაძლოა, ბევრი ქვეყანა დააზარალოს და ცეცხლი ევროპის სხვადასხვა ქალაქში აალდეს.