ვიდეო თამაშების მოწინააღმდეგეები ხშირად ამბობენ, რომ ისინი დროს ფუჭად გვაკარგინებენ. მომხრეები კი ამობენ, რომ ვიდეო თამაშებს ადამიანისთვის დიდი სიამოვნების მინიჭება და რაღაცის სწავლებაც კი შეუძლია. ამასთანავე, უკანასკნელ პერიოდში ვიდეო თამაშებს ხშირად იყენებენ გარკვეული დაავადების სამკურნალო თერაპიაში. მაგალითად, ჩუნ-იანგის სამხრეთ კორეული უნივერსიტეტის სპეციალისტებმა შექმნეს თამაში, რომელიც ადამიანებს ალკოჰოლიზმის დაძლევაში დაეხმარება.

რა თქმა უნდა, ეს ყველაფერი უცნაურად ჟღერს, მაგრამ კვლევის თანახმად, აღნიშნული მეთოდი მართლაც მოქმედებს. მისი არსი კი სპირტიანი სასმელებისადმი ფსიქოლოგიური მიზიდულობის შემცირებასა და ტვინში ასოციაციის შექმნაში მდგომარეობს, რომელიც მიმართულია იმისკენ, რომ "ჩაახშოს" პირობითი რეაქცია, რომელიც ალკოჰოლის მიღებაზე არის გამომუშავებული.

თავად თამაში 3-ეტაპიანია: პირველი ეტაპი მშვიდ ტონალობაშია გადაწყვეტილი და მშვიდი მუსიკის ხმა ისმის. ამ ეტაპზე მოთამაშე დუნდება და თავსმოხვეული აზრებისგან თავისუფლდება. მეორე ეტაპი ნებისყოფის გამომუშავებისა და გაძლიერებისკენ არის მიმართული - მოთამაშე ვირტუალურ ბარში ხვდება, სადაც მას სასმელს სთავაზობენ. როდესაც სასმელზე უარს ამბობს, მოთამაშე დამატებით ქულებს გამოიმუშავებს. მესამე დონე კი, ძირითადად, ინფორმაციულია - ადამიანი იღებს ინფორმაციას და თვალნათლივ ხედავს ალკოჰოლზე დამოკიდებულების დამღუპველ შედეგებს.

ერთი შეხედვით, აღნიშნული მეთოდის ეფექტურობა შეიძლება, ეჭვქვეშ დააყენოთ, თუმცა ექსპერიმენტში მონაწილე 12-მა ადამიანმა მისი ეფექტურობა დაადასტურა. თითოეული მათგანი ალკოჰოლის მიღების სურვილის შემცირებაზე საუბრობს და ამასთანავე, აღნიშნავს, რომ საკუთარი სურვილების კონტროლი ისწავლა. გარდა ამისა, ექსპერტები ამბობენ, რომ მათი მიდგომა შეიძლება, სხვა სახის ფსიქიკური აშლილობების დროსაც ეფექტური იყოს, მაგალითად, კლაუსტროფობიისა და სიბნილის შიშის წინააღმდეგ.