პრეზიდენტმა, სამწუხაროდ, შეურაცხყოფა მიაყენა მთლიანად საკონსტიტუციო კომისიას, - ამის შესხებ პარლამენტის თავდაცვისა და უშიშროების კომიტეტის თავმჯდომარემ, ირაკლი სესიაშვილმა, განაცხადა, რომელიც პრეზიდენტის მიერ გუშინ გაკეთებულ განცხადებას გამოეხმაურა.

ირაკლი სესიაშვილის თქმით, პრეზიდენტმა შეურაცხყოფა მიაყენა არა "ქართულ ოცნებასა" და ხელისუფლებას, არამედ მთლიანად საკონსტიტუციო კომისიას, რომელიც ამ საკითხებზე მუშაობს.

"ჩვენ ვაგრძელებთ მსჯელობას. მოგეხსენებათ, რომ 2010 წლის კონსტიტუციური ცვლილებების შესაბამისად, პრეზიდენტს ისედაც უკვე შეკვეცილი უფლებები გააჩნია და გიორგი მარგველაშვილის პოლიტიკური სპეკულაციის პრევენციის მიზნით მეტ-ნაკლებად ვთანხმდებით, რომ შემდეგი არჩევნები იყოს პირდაპირი წესით არჩევნის წესის თანახმად.

ეს იმიტომ მოხდა, რომ მარგველაშვილს არ დაეწყო პოლიტიკური სპეკულაცია. მისი განცხადება არა თუ არაადეკვატურია, არამედ კომისიის ყველა წევრის დისკრედიტაციას ემსახურება", - განაცხადა ირაკლი სესიაშვილმა.

დეპუტატის თქმით, მიუხედავად მსგავსი პოლიტიკური სპეკულაციებისა, კომისია კონცენტრირებული დარჩება იმაზე, რომ კონსტიტუცია იყოს მაქსიმალურად ჯანსაღი და დემოკრატიული ჩარჩოების ფარგლებში.

"ვცდილობთ კონსტიტუცია მთლიანად რესპუბლიკური მმართველობის სტანდარტში ჩაჯდეს, არ ავყვებით ამ განცხადებებს. სამწუხაროდ, პრეზიდენტმა დაიწყო სპეკულირება იმ თემით, რომლის პრევენცირებაც ჩვენ მოვახდინეთ და ვთქვით, რომ შემდეგი არჩევნები იქნება პირდაპირი წესით.

ამით ჩვენ მოვუჭერით ყველა იმ პოლიტიკურ ძალას და მათ შორის პრეზიდენტს იმ სპეკულირების გზა, რომ ეთქვა - მე მებრძვიანო, ან რომელიმე პოლიტიკურ ჯგუფს ებრძვიანო. როგორც ჩანს, პრეზიდენტს ერთგვარად ეწყინა, რომ ჩვენ არ დავუჭირეთ ირიბი არჩევის წესის მომდევნო არჩევნებზე შემოღებას და ეს მოლოდინი რომ არ გაუმართლდა, ამ სპეკულაციის გზით წავიდა, რაც ძალიან სამწუხაროა", - აღნიშნა სესიაშვილმა.

მისივე თქმით, იმედია, პოზიცია ბოლომდე იქნება დაცული საკონსტიტუციო კომისიის და მომავალი არჩევნები პირდაპირი არჩევის წესით ჩატარდება, ხოლო მას შემდეგ შეიქმნება მოდელი, რაც დემოკრატიული რესპუბლიკისთვის არის მისაღები.