"ახალი საქართველოს" ერთ-ერთი ლიდერის ლევან ხაბეიშვილის ინფორმაციით, მე-9 მოწვევის პარლამენტის 123 დეპუტატს კანონპროექტზე ამ დრომდე არ უმუშავია.

ხაბეიშვილი პარლამენტარების საქმიანობასთან დაკავშირებით ინფორმაციას ავრცელებს.

მისი ცნობით, 110 დღეში საქართველოს პარლამენტის 150–მა დეპუტატმა 1749 მოქალაქე მიიღო, საშუალოდ, 110 დღეში ერთი დეპუტატი შეხვდა 11 მოქალაქეს, რაც ნიშნავს, რომ საშუალოდ ერთი დეპუტატი 10 დღეში ერთხელ ხვდებოდა ერთ მოქალაქეს.

"110 დღეში 150 დეპუტატიდან საკანონმდებლო ინიციატივაზე, რომელიც ჯამში ამ პერიოდში 9 იყო, 27 – მა დეპუტატმა იმუშავა. ანუ, საქართველოს პარლამენტის 123 დეპუტატს მას შემდეგ, რაც მე – 9 მოწვევის პარლამენტარები გახდნენ, კანონპროექტზე არ უმუშავია და არანაირი ინიციატივა ამ მიმართულებით არ ჰქონიათ. 9 ინიციატივა, რომელიც ამ ხნის განმავლობაში დეპუტატებმა დაამუშავეს, ეხებოდა საგადასახადო მიმართულებას, რომელმაც კიდევ უფრო გააძვირა ცხოვრება, სუს-ს და მოსმენების "დაკანონებას", საქართველოს პარლამენტში რეგლამენტის ცვლილებას, ეროვნულ ბანკს და ასე შემდეგ", - აცხადებს ლევან ხაბეიშვილი.

რაც შეეხება ოპოზიციურ პარტიებს, ხაბეიშვილის მტკიცებით, ირმა ინაშვილს და მის პარტიას არანაირი კანონპროექტის ინიცირება არ გაუკეთებიათ ისევე, როგორც გიგა ბოკერიას და ფრაქცია "ევროპულ საქართველოს".

"ამ მიმართულებით არც ,,ენმ" იწუხებს თავს და მათაც მხოლოდ ერთი ინიციატივა ჰქონდათ, რომელიც მთავრობის "გაზპრომთან" მოლაპარაკებას ეხებოდა. ფაქტია, ამომრჩეველი მოტყუებულია, როგორც ხელისუფლების მხრიდან, ისე ოპოზიციური თუ ფსევდო ოპოზიციური პარტიების მხრიდან. არანაირი ინიციატივა და მუშაობის ნიშან-წყალი არც ამ პარლამენტს ეტყობა", - აცხადებს ხაბეიშვილი.