"ერთობა ახალი საქართველოს" თბილისის მერობის კანდიდატის, გიორგი ვაშაძის ინფორმაციით, ბევრ საარჩევნო უბანზე "ქართული ოცნების" წარმომადგენელი კომისიის წევრებს თავზე ადგას.

როგორც ვაშაძემ დღეს გამართულ ბრიფინგზე განაცხადა, აღნიშნული ქმედებით ხდება ფსიქოლოგიური ზეწოლა ამომრჩეველზე.

"პასპორტებს უმოწმებენ ამომრჩეველს, თუ ვინ მოვიდა და ვინ არა. ეს არის დარღვევა. არ აქვს უფლება დამკვირვებელს ასე მივიდეს კომისიის წევრის მაგიდასთან. ეს არის მასიური, სისტემური ხასიათის დარღვევა. პირდაპირ გეტყვით, ასე არჩევნებს ვერ მოიგებთ. ეს არის პირდაპირი ფსიქოლოგიური ზეწოლა ამომრჩეველზე", - განაცხადა ვაშაძემ და თბილისის მოსახლეობას აქტიურობისკენ მოუწოდა.

ვაშაძის თქმით, ასევე ფიქსირდება ე.წ. ქუჩის ბიჭების მობილიზება საარჩევნო უბნებთან და შეხლა-შემოხლები, რომლებიც ოპოზიციურ ამომრჩეველს არ უშვებენ უბანზე და თავის ამომრჩეველს აიძულებენ, რომ უბანზე შევიდნენ.

"როგორც ჩანს, "ქართულმა ოცნებამ" დღის მეორე ნახევარში მაქსიმალურად გაააქტიურა თავისი ამომრჩეველი, რომ შედეგზე გავიდნენ", - აღნიშნა ვაშაძემ.

მერობის კანდიდატმა კიდევ ერთხელ მოითხოვა შსს-სგან, რომ დაკავებული იქნას მოქალაქე, რომელმაც მისი პარტიის აქტივისტს ფიზიკური შეურაცხყოფა მიაყენა.