ადამიანის უფლებათა ევროპული სასამართლოს გადაწყვეტილებით, საქართველომ ვანო მერაბიშვილს არამატერიალური ზიანის ანაზღაურების სახით 4 ათასი ევრო უნდა გადაუხადოს.

სასამართლოს დღევანდელ გადაწყვეტილებაში აღნიშნულია, რომ მოსარჩელე 15 000 ევროს გადახდას ითხოვდა. სასამართლო მიიჩნევს, რომ "მოსარჩელეს გარკვეული სტრესი და მღელვარება უნდა ჰქონოდა კონვენციის მე-5 § 3 და მე-18 მუხლების დარღვევის გამო".

სამართლიანობის საფუძველზე, სასამართლომ გადაწყვეტილება მიიღო მოსარჩელეს აუნაზღაურდეს 4 000 ევრო.

ამასთან, ევროპის ადამიანის უფლებათა ევროპულმა სასამართლომ, შს ყოფილ მინისტრ ვანო მერაბიშვილთან დაკავშირებით მე-18 მუხლის დარღვევა დაადგინა. გადაწყვეტილება სტრასბურგის სასამართლოს ვებ-გვერდზე გამოქვეყნდა. როგორც გადაწყვეტილებაშია ნათქვამი, დიდი პალატის 9 წევრმა საქმეში ევროკონვენციის მე-18 მუხლის დარღვევას მხარი დაუჭირა, 8 კი წინააღმდეგ წავიდა.

"სასამართლომ ერთხმად დაადგინა, რომ არ დარღვეულა 51-ე მუხლი (თავისუფლებისა და უსაფრთხოების უფლება, მერაბიშვილის წინასწარ პატიმრობასთან დაკავშირებით), ასევე მერაბიშვილის წინასწარი პატიმრობის შენობაში მოთავსებასთან დაკავშირებით არ დარღვეულა 53-ე მუხლი. ადგილი ჰქონდა 53 მუხლის დარღვევას 2013 წლის 25 სექტემბრიდან. ასევე 9 ხმით 8-ის წინააღმდეგ სასამართლომ დაადგინა, რომ დაირღვა ევროკონვენციის მე-18 მუხლი", - ნათქვამია სტრასბურგის სასამართლოს გადაწყვეტილებაში.

სარჩელით, რომელიც მერაბიშვილის დაცვის მხარემ სტრასბურგში გააგზავნა, ევროკონვენციის მე-18 მუხლის დარღვევა გამოიხატებოდა იმაში, რომ ვანო მერაბიშვილის წინასწარ პატიმრობას შენიღბული მოტივი ჰქონდა და ის პოლიტიკური მოტივებით იყო გამოყენებული.