ჩვენ მხარს ვუჭერთ საქართველოს, რომ იგი გახდეს ძლიერი დემოკრატიის ქვეყანა, თუმცა სხვა კუთხით ნებისმიერი გადაწყვეტილება არის ამ ქვეყნის სუვერენული უფლება და ის ამაში თავისუფალია, - ამის შესახებ საქართველოში აშშ-ს ელჩმა იან კელიმ მიხეილ სააკაშვილის საკითხზე დასმული კითხვის კომენტირებისას განაცხადა.

როგორც ამერიკის ელჩმა აღნიშნა, ამერიკის მთავრობა ყურადღებით ადევნებს პროცესებს თვალს და მიიჩნევს, რომ აუცილებელია პროცესები წარიმართოს სამართლიან გარემოში.

"ჩვენ ყურადღებით ვაკვირდებით მიმდინარე პროცესებს. რა თქმა უნდა, აუცილებელია, რომ იყოს სამართლიანი პროცესი და იყოს ეს პროცესი ზედმიწევნით დაცული. ეს, რა თქმა უნდა, ყველა მოქალაქის მიმართ უნდა იყოს და არა მხოლოდ ყოფილი პრეზიდენტის მიმართ. რაც შეეხება იმას, თუ რა გავლენას მოახდენს ეს საქართველოზე, ბევრჯერ მითქვამს, რომ ჩვენ მხარს ვუჭერთ საქართველოს, რომ იგი განვითარდეს და გახდეს ძლიერი, მტკიცე დემოკრატიის ქვეყანა და მან თავისი რესურსები მიმართოს სტაბილური და წარმატებული მომავლისკენ, ხოლო სხვა კუთხით ნებისმიერი გადაწყვეტილება არის ქვეყნის სუვერენული გადაწყვეტილება", - განაცხადა ამერიკის ელჩმა საქართველოში იან კელიმ.