საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენლის ფედერიკა მოგერინის ოფისი არჩილ ტატუნაშვილის გარდაცვალებასთან დაკავშირებით განცხადებას ავრცელებს.

"სამხრეთ ოსეთში, საქართველოში ბოლო მოვლენები, განსაკუთრებით საქართველოს მოქალაქის არჩილ ტატუნაშვილის სიკვდილი და ორი მოქალაქის დაკავება სერიოზული აღშფოთების წყაროა. სამძიმარს ვუცხადებთ ტატუნაშვილის ოჯახს. ევროკავშირი მზად არის სადამკვირვებლო მისიის საშუალებით მხარი დაუჭიროს მიმდინარე გამოძიებას და ხელი შეუწყოს დისკუსიებს ინციდენტის პრევენციისა და მათზე რეაგირების მექანიზმის ფარგლებში", - ნათქვამია განცხადებაში.

მასში ასევე აღნიშნულია, რომ "დაკავებული საქართველოს ორი მოქალაქის გათავისუფლების შემდეგ ცხინვალის დე ფაქტო ხელისუფლებამ დაუყოვნებლივ უნდა უზრუნველყოს, რომ მათ საშუალება მიეცეთ თბილისის მიერ კონტროლირებად ტერიტორიაზე გაემგზავრონ".

"ბოლო მოვლენები ხაზს უსვამს იმას, რომ საჭიროა დამატებითი ზომები გამჭვირვალობისა და ნდობის უზრუნველყოფისთვის. ევროკავშირში კიდევ ერთხელ ხაზგასმით აღნიშნეს, რომ მხარს უჭერენ საქართველოს სუვერენიტეტსა და ტერიტორიულ მთლიანობას საერთაშორისოდ აღიარებულ საზღვრებში", - აღნიშნეს ფედერიკა მოგერინის ოფისში.

შეგახსენებთ, რომ 22 თებერვალს, საოკუპაციო რეჟიმმა საქართველოს 3 მოქალაქე - არჩილ ტატუნაშვილი, ლევან ქუტაშვილი და იოსებ პავლიაშვილი ახალგორში დააკავა. 23 თებერვალს კი გავრცელდა ინფორმაცია, რომ არჩილ ტატუნაშვილი გაურკვეველ ვითარებაში გარდაიცვალა.