საქართველოს მოქალაქეობის მინიჭების წესები იცვლება | Allnews.Ge

საქართველოს მოქალაქეობის მინიჭებისთვის საქართველოში ცხოვრების ცენზი შესაძლოა გაიზარდოს. "მოქალაქეობის შესახებ" კანონში დაგეგმილი ცვლილებების თანახმად, ჩვეულებრივი წესით მოქალაქეობის მინიჭებისას, ხუთწლიანი ცხოვრების ცენზი 10-წლამდე იზრდება. გამარტივებული წესით მოქალაქეობის მინიჭებისას კი, საქართველოში ორწლიანი ცხოვრების ცენზი, შესაძლოა, ხუთ წლამდე გაიზარდოს.

ამასთან, საქართველოს მოქალაქეობის მინიჭების საქმეში პრეზიდენტის კომპეტენცია იცვლება. კანონში დაგეგმილი ცვლილებებით, პრეზიდენტს აღარ ექნება მოქალაქეობის საკითხის განხილვასთან დაკავშირებული რიგი საკითხების რეგულირების კომპეტენცია. ერთ-ერთი ცვლილებით, საგამონაკლისო წესით გათვალისწინებულ შემთხვევაში, პირი საქართველოს მოქალაქეობის მინიჭების თაობაზე განცხადებას პრეზიდენტს აღარ წარუდგენს - ცვლილებების მიხედვით, საგამონაკლისო წესით მოქალაქეობის მინიჭებაზე განცხადება წარედგინება სააგენტოს, საზღვარგარეთ დიპლომატიურ წარმომადგენლობას ან საკონსულო დაწესებულებას.

გარდა ამისა, მოქალაქეობის მინიჭების, შეწყვეტის, დაკარგვის წესი, აგრეთვე საქართველოს საპატიო მოქალაქის მინიჭების წესი პრეზიდენტის ბრძანების ნაცვლად, მოქალაქეობის საკითხთა კომისიის დადგენილებით განისაზღვრება.

გარდა ამისა, "მოქალაქეობის შესახებ" კანონით ის პირობები დგინდება, რა შემთხვევაშიც საქართველოს მოქალაქე სხვა ქვეყნის მოქალაქეობის მიღებისას, საქართველოს მოქალაქეობას შეინარჩუნებს.

აღნიშნული სიახლე ახალი რედაქციის კონსტიტუციას უკავშირდება, რომლის მიხედვით, საქართველოს მოქალაქეს აღარ ეკრძალება იყოს იმავდროულად სხვა სახელმწიფოს მოქალაქე და უცხო ქვეყნის მოქალაქეობის მიღება საქართველოს მოქალაქეობის ავტომატურ დაკარგვას არ იწვევს.

კანონში დაგეგმილი ცვლილებების პროექტის თანახმად, საქართველოს მოქალაქე სხვა ქვეყნის მოქალაქეობის მოპოვების შემთხვევაში, საქართველოს მოქალაქეობას ინარჩუნებს, თუ ის უცხო ქვეყნის მოქალაქეობის მოპოვებამდე საქართველოს სახელმწიფოდან მიიღებს თანხმობას საქართველოს მოქალაქეობის შენარჩუნებაზე.

თავის მხრივ, საქართველოს მოქალაქეობის შენარჩუნებაზე თანხმობა გაიცემა, თუ საქართველოს მოქალაქის სამომავლო კავშირი საქართველოსთან სარწმუნოდ იქნება მიჩნეული და არსებობს ერთ-ერთ შემდეგი პირობა: საქართველოს მოქალაქის ოჯახის წევრი იმ ქვეყნის მოქალაქეა, რომლის მოქალაქეობის მიღებას ის აპირებს და საქართველოს მოქალაქე სულ მცირე, ხუთი წლის განმავლობაში კანონიერი საფუძვლით ცხოვრობს ან მუშაობს ქვეყანაში, რომლის მოქალაქეობის მიღებასაც ის აპირებს.

მომზადებული კანონპროექტით სიახლეს წარმოადგენს მოქალაქეობის აღდგენის დროებითი უფლება. კერძოდ, საქართველოს ყოფილ მოქალაქეს, რომელმაც საქართველოს მოქალაქეობა სხვა ქვეყნის მოქალაქეობის მოპოვების გამო დაკარგდა, უფლება ეძლევა, კანონის ამოქმედებიდან ერთი წლის ვადაში სახელმწიფო სერვისების განვითარების სააგენტოს საქართველოს მოქალაქეობის აღდგენის მოთხოვნით მიმართოს.

"მოქალაქეობის შესახებ" კანონში დაგეგმილი ცვლილებები პარლამენტს იურიდიულ საკითხთა კომიტეტის სახელით წარედგინება.