საქართველოში 13 ქვეყნის მონაწილეობით სამხედრო სწავლება დაიწყო | Allnews.Ge

"ძალა პარტნიორობაშია" - ამ გზავნილით საქართველო მრავალეროვნულ სწავლებას "ღირსეული პარტნიორი 2018" უკვე მეოთხედ მასპინძლობს.

საერთაშორისო წვრთნა ოფიციალურად ვაზიანის აეროდრომზე გაიხსნა, სადაც სწავლებაში ჩართული 13-ვე ქვეყნის სამხედრო მოსამსახურეები და მონაწილე ტექნიკაა მოწყობილი.

სპეციალურად ამ დღისთვის საქართველოში ჩამოვიდნენ ამერიკელი გენერლები.

სამხედრო საჩვენებელი ორკესტრის მიერ საქართველოს სახელმწიფო ჰიმნის შესრულებისა და წუთიერი დუმილით დაღუპული სამხედროებისთვის პატივის მიგების შემდეგ, სამხედრო მოსამსახურეებს სიტყვით მიმართეს პრეზიდენტმა, გიორგი მარგველაშვილმა, პრემიერ-მინისტრმა, მამუკა ბახტაძემ, პარლამენტის თავმჯდომარემ, ირაკლი კობახიძემ, თავდაცვის მინისტრმა, ლევან იზორიამ, გენერალური შტაბის უფროსმა, გენერალ-მაიორმა, ვლადიმერ ჩაჩიბაიამ, აშშ-ს ელჩის მოვალეობის შემსრულებელმა, ელიზაბეთ რუდმა და აშშ-ს ეროვნული გვარდიის ბიუროს მეთაურმა, გენერალმა, ჯოსეფ ლინგელმა.

გახსნის ცერემონიალზე ამერიკელი და გერმანელი სამხედროები საჰაერო სადესანტო საჩვენებელ ოპერაციებს ჩაატარებენ. დესანტირების ჯგუფის მიზანი იმიტირებული მოწინააღმდგის განადგურება-ბუნკერის გაწმენდაა. ოპერაციის დაშვების ზონაში სადესანტო ჯგუფი შავი ქორის ვერტმფრენებით ჩამოქვეითდება. სამხედროების ერთი ნაწილი საცეცხლო მხარდაჭერას განახორციელებს, ხოლო მეორე სამანევრო ოპერაციის შესრულებაზე იქნება პასუხისმგებელი.

გახსნის ოფიციალური ცერემონიალის დასასრულს მოწვეულ სტუმრებს ვაზიანის აეროდრომზე სწავლებაში მონაწილე პირად შემადგენლობასთან გასაუბრებისა და ტექნიკის დათვალიერების საშუალება მიეცემათ. ღონისძიებას სხვადასხვა უმაღლესი სასწავლებლის სტუდენტებიც ესწრებიან.

სწავლება 15 აგვისტოს ჩათვლის გაგრძელდება და მასში 13 ქვეყანა იღებს მონაწილეობას: საქართველო, აშშ, დიდი ბრიტანეთი, გერმანია, ესტონეთი, საფრანგეთი, ლიეტუვა, პოლონეთი, ნორვეგია, თურქეთი, უკრაინა, აზერბაიჯანი და სომხეთი.

სწავლების მიზანია საქართველოს აშშ-ს და პარტნიორ ქვეყნებს შორის მზადყოფის და თავსებადობის ამაღლება, ასევე სტაბილურობის თავდაცვითი და შეტევის ოპერაციებში უნარ-ჩვევების გაუმჯობესება და შავი ზღვის აუზში უსაფრთხოების გარემოს შექმნაში წვლილის შეტანა.