მე მაქვს თხოვნა, არავითარი ეიფორია, არავითარი ზეიმი. ჩვენ წინ გვაქვს მეორე ტური, - ამის შესახებ მოძრაობა "ძალა ერთობაშიას" საპრეზიდენტო კანდიდატმა, გრიგოლ ვაშაძემ განაცხადა.

"გილოცავთ ყველა ჩვენს მხარდამჭერს, საქართველოს ყველა მოქალაქეს, ღირსების არჩევნები შედგა და მიუხედავად ტონობით ფულისა, რომელიც დახარჯა ე.წ. ხელისუფლებამ, მიუხედავად გაყალბებისა, მცდელობებისა, რომ თავისი კანდიდატისთვის დაეწერათ გამარჯვება, ეს არ გამოუვიდათ. ჩვენ პარალელურად ვითვლით ოქმებს და ამაზე ვისაუბრებთ. მე მაქვს თხოვნა, არავითარი ეიფორია, არავითარი ზეიმი, ჩვენ წინ გვაქვს მეორე ტური, რომელსაც აუცილებლად მოვიგებთ და საქართველოში დაიწყება ხელისუფლების ცვლა. ეს უკვე გარდაუვალია. ღირსების არჩევნებში საქართველოს მოქალაქემ თავისი პოზიცია გამოხატა. პირობას გაძლევთ, რომ ისევე ვიმუშავებთ მტკიცედ, როგორც ვმუშაობდით აქამდე. ამ ტრიბუნიდან მინდა მადლობა ვუთხრა "ევროპულ საქართველოს" და პირადად დავით ბაქრაძეს, რომელმაც უმაღლესი სტანდარტი აჩვენა, მადლობა "რესპუბლიკურ პარტიას", რომლის წარმომადგენლებს უკვე შევხვდი. ეჭვი არ შეგეპაროთ, რომ დანარჩენი პარტიებიც ამას გააკეთებენ და ეს იქნება ყველა მინუს ერთი. გუშინ მეუბნებოდნენ რატომ არ ზეიმობო და ისეთი დაღლილი ვიყავი, ზეიმის თავი არ გვქონდა და აი დღეს დავიწყებთ ზეიმს", - განაცხადა ვაშაძემ.