"არჩევნებამდე 2 დღით ადრე ვიღაც სიგნალს იძლევა, რომ..." - რას წერს იან კელი დღეს ჩატარებულ საგამოძიებო მოქმედებებსა და პირებზე, ვის სახლშიც ჩხრეკა ჩატარდა
ვიღაც სიგნალს იძლევა, რომ არჩევნების შემდეგ ნებისმიერი პროდასავლური ოპოზიციის დახურვის მუქარებს შეასრულებენ. ამის შესახებ საქართველოში აშშ-ის ყოფილი ელჩი, იან კელი “ტვიტერის” პირად გვერდზე წერს.
“ორივე [ეთო ბუზიაშვილი და სოფო გელავა] ძალიან დაფასებულია საქართველოში რუსეთის მავნე გავლენის შესახებ გაწეული მუშაობის გამო. არჩევნებამდე 2 დღით ადრე. ვიღაც სიგნალს იძლევა, რომ არჩევნების შემდეგ ნებისმიერი პროდასავლური ოპოზიციის დახურვის მუქარებს შეასრულებენ”, - წერს კელი.არსებული ინფორმაციით, ფინანსთა სამინისტროს საგამოძიებო სამსახურმა რამდენიმე პირის სახლში ჩხრეკა ჩაატარა. ერთ-ერთი პირი ოპოზიციონერი პოლიტიკოსი გიორგი ნონიაშვილია. მისი მეუღლე Atlantic Council-ის თანამშრომელი სოფო გელავა აცხადებს, რომ მის სახლში ჩატარებული ჩხრეკა, არჩევნებამდე სამი დღით ადრე, ეჭვს ბადებს.
სოფო გელავას თქმით, ჩხრეკა დაკავშირებულია Atlantic Council-თან, კომპანიასთან, რომლის კონტრაქტორიც არის.
ამასთან, თბილისში, „ვაკე პლაზაში“ მდებარე ამერიკულ კომპანია Concentrix Georgia-ში ფინანსთა სამინისტროს საგამოძიებო სამსახურის თანამშრომლები შევიდნენ. „ფორმულას“ ინფორმაციით, 3 სართულზე ჩატარდა ჩხრეკა.
მოგვიანებით, საქართველოს ფინანსთა სამინისტროს საგამოძიებო სამსახურმა გაავრცელა ინფორმაცია, რომ წარმოებაში არსებულ სისხლის სამართლის საქმესთან დაკავშირებით მიღებული ოპერატიული ინფორმაციის შესაბამისად, სამ სავარაუდო ე. წ. „ქოლცენტრში” ჩატარდა საგამოძიებო მოქმედებები და მოსამართლის განჩინების საფუძველზე გაიჩხრიკა მითითებული ობიექტები